Holanda fluturon në çerekfinale. Sllovakia largohet me kokën lart

Ndeshja në Durban nuk ka qenë spektakolare dhe nuk rezervoi goleadë. Megjithëse debutuese, Sllovakia tregoi se është një skuadër e fortë. Këtë e tregon rezultati 2-1 me të cilin Holanda siguroi kualifikimin në çerekfinale, aty ku sfidat bëhen shumë të ashpra. “Tulipanët” vazhdojnë ecurinë me hapa të vegjël, pa bërë bujë, duke praktikuar një futboll praktik e pragmatist dhe hyjnë në zemrën e Kupës së Botës 2010. Goli i parë realizohet nga Roben, ndërsa shifrat dyfishohen nga Shnajder. Dy yjet e përfaqësueses “portokalli”. Por, ndërmjet golave janë regjistruar edhe dy raste të shkëlqyera për sllovakët, të cilat u neutralizuan nga portieri Stekelemburg. Vitek arrin të ngushtojë diferencën në të 94-tën me penallti, por ishte shumë vonë për të tentuar përmbysjen. Gjithsesi, skuadra e drejtuar nga Vladimir Vais përshëndet Afrikën e Jugut me kokën lart dhe mund të mburret me faktin se dërgoi përpara kohe në shtëpi Italinë, kampionen e botës në fuqi.

Ndryshe nga sa pritej, Sllovakia luajti e hapur, pasi nuk kishte asgjë për të humbur. Megjithatë, vrulli i të besuarve të Veis u ndërpre vetëm pas 18 minutave lojë, kur Arjen Roben, i aktivizuar për herë të parë si titullar, shënoi në mënyrën e tij. Holandës i mjaftuan vetëm dy pasime për të ndarë në dy pjesë kundërshtarët, topi kaloi në të djathtën tek ylli i Bajernit të Mynihut, i cili futet në qendër dhe mes tre kundërshtarëve gjuan, duke e dërguar topin pas shpinës së portierit Muça. Sllovakët tentojnë të reagojnë, pa arritur të shqetësojnë mbrojtjen “portokalli”, ndërsa rrjeta e avantazhit mbetet emocioni i vetëm i 45 minutave të para. Fraksioni i dytë i lojës nis në mënyrë të jashtëzakonshme për holandezët, që në harkun e 5 minutave regjistrojnë dy shanse për gol, por Roben dhe Matijsen janë të pafat përpara portës. Në të 67-tën, “tulipanët” shpëtojnë falë ndërhyrjeve të Stekelenburg: fillimisht ai largon një tentativë të Stok, ndërsa më pas eviton një gol të sigurt, pas gjuajtjes së Vitek nga një distancë e afërt. Trajneri Bert Van Marvijk nuk trembet dhe aktivizon sulmues (Elian dhe Huntelar), por goli vjen nga Shnajder, që thjesht shtyn në rrjetë asistin e Kuijt. Sllovakia kërkon të lejë shenjë dhe në minutat shtesë realizon me Vitek me penallti. Kjo ishte rrjeta e katërt e sulmuesit në Afrikën e Jugut, duke përfshirë edhe dygolëshin që ktheu Italinë në shtëpi.