ISHP: Vaksina pentavalente mbron fëmijët nga 5 sëmundje

Të gjithë fëmijëve të lindur që nga data 1 janar 2009 u ofrohet vaksina pentalalente (5 në 1), e cila i mbron ata nga 5 sëmundje. Ministria e Shëndetësisë, duke konsideruar vaksinën të domosdoshme dhe të efektshme për shëndetin e foshnjave, sqaron se vaksinimi ka nisur gjatë këtij muaji.  Kjo vaksinë, e cila ofrohet falas, kryhet në moshën 2, 4, dhe 6 muaj. Burime nga Instituti i Shëndetit Publik sqarojnë se vaksina pentavalente, "5 në 1", parandalon 5 sëmundje; Difterinë, Tetanozin, Kollën e mirë (Pertusi), Hepatitin B (Verdhëza) dhe Infeksionet e shkaktuara nga Haemophilus influenzae tip b (Hib), në veçanti Meningitin. "Deri tani kemi patur një vaksinë DTP për Difteri, Tetanoz, Pertusis dhe një për Hepatitin B, por që nga 2 marsi i vitit 2009 do të parandalojmë edhe një sëmundje tjetër, Meningitin e shkaktuar nga Haemophilus Influenzae tipi b", sqarojnë të njëjtat burime. Vaksina është në formë të lëngshme që përmban vetëm 1 dozë (një flakon për çdo fëmijë). "Vaksina 5 në 1, përveçse ofron komponentin e ri për Haemophilus influenzae tip b bën të mundur gjithashtu aplikimin me një injeksion të vetëm, të tre vaksinave", pohojnë burimet nga ISHP. Fëmijët e porsalindur do të vazhdojnë të vaksinohen me vaksinën e Hepatitit B menjëherë pas lindjes. Aplikimi i kësaj vaksine, ashtu si dhe për të gjithë injeksionet në Programin Kombëtar të Vaksinimit do të bëhet me anë të shiringave me një përdorim vetë shkatërruese.