ISHP mashtron, numri i asistencës antiduhan nuk ekziston
Z. kryeministër.
Pas dy letrave të hapura që Ju kam adresuar nëpërmjet faqeve të gazetës “TemA”, unë vazhdoj të mos besoj që në një qeverisje normale, të pandikuar prej klaneve e konjukturave përfituese politike, të mund të ndodhë që drejtuesi i një institucioni, me aktivitet mbrojtjen e shëndetit të taksapaguesve, të mund t’i mashtrojë këta të fundit. Mirëpo kjo fatkeqësisht ndodh. Ndodh me Institutin e Shëndetit Publik, që është në vartësi administrative vertikale nga Ministria e Shëndetësisë, pjesë e kabinetit që Ju drejtoni. Por ajo që më bën më shumë përshtypje është fakti, sipas të cilit mashtrimi institucional ka muaj që është prezent dhe askush nga instancat kontrolluese nuk e ka marrë mundimin ta konstatojë.
Për të qenë më konkret, po Ju sqaroj:
Në takimin e bërë në datën 11.02.2008, midis të tjerave, komitetit ndërsektorial “Për mbrojtjen e Shëndetit nga Produktet e Duhanit”, mori vendimin për vendosjen e paralajmërimeve të detyruara shëndetësore dhe informacioneve të tjera mbi paketat e produkteve të duhanit. Sipas procesverbalit që unë disponoj, del se pjesëmarrës në të ishin: Nard Ndoka, ish-ministër i Shëndetësisë, njëherësh dhe kryetar i këtij komiteti, Florian Mima, zëvendësministër i Financave, anëtar i komitetit, Ferdinand Poni, zëvendësministër i Brendshëm, anëtar i këtij komiteti, Halit Shamata, zëvendësministër i Arsimit dhe Shkencës, anëtar i këtij komiteti, Zana Turku, zëvendësministre e Turizmit, Kulturës, Rinisë dhe Sporteve etj., si dhe Alban Ylli, drejtor i Institutit të Shëndetit Publik, njëherësh dhe sekretar i këtij Komiteti.
Sipas vendimit të marrë në atë takim, e që mban nr. 2, citoj: “…pasi mori në shqyrtim vendosjen e paralajmërimeve shëndetësore dhe informacioneve të tjera, si dhe mbas konsultimesh edhe me grupet e interesit, në mbështetje dhe në zbatim të neneve 4 dhe 18 të ligjit nr. 9636, datë 6.11.2006, “Për Mbrojtjen e Shëndetit nga Produktet e Duhanit”, - krahas formës dhe tekstit të paralajmërimeve të detyrueshme shëndetësore në produktet e duhanit (si mesazhet paralajmëruese shëndetësore për dëmet që shkakton në shëndet përdorimi i produkteve të duhanit etj.), KNMSHPD miratoi edhe ngritjen e një qendre për dhënien e asistencës. Kjo gjë është e përcaktuar në germën “j “ të këtij vendimi dhe vjen pas germave “h” dhe “i”, ku citohet: “Lenia e duhanit pakëson rrezikun e sëmundjeve vdekjeprurëse të zemrës dhe mushkërive”,“Duhanpirja mund të shkaktojë një vdekje të ngadaltë dhe të dhimbshme”. Në germën “j” lexohet: “Kërkoni ndihmë për të lenë duhanin, telefon 08004747 - Sektori i Abuzimit me substancat, Instituti i Shëndetit Publik”.
Deri këtu gjithçka është në rregull, brenda sensit human që përmban ligji antiduhan, dhe detyrës institucionale për të ruajtur shëndetin e publikut të gjerë nga efektet shfarosëse të duhanpirjes. Ndaj dhe është normale kur lexon në procesverbal se: “Ky vendim u mor në unanimitet të plotë të të gjithë anëtarëve të Komitetit ndërsektorial të Mbrojtjes së Shëndetit nga produktet e Duhanit të pranishëm në këtë mbledhje”. Po sipas procesverbalit, “ky vendim hyn në fuqi menjëherë dhe zbatimi i tij fillon më datën 1 janar 2009”.
Mirëpo, z. kryeministër, ka ndodhur që nga afati i përcaktuar ligjor e deri më sot kanë kaluar tre muaj dhe sensi human i këtij vendimi është kthyer në dëshpërues. Kjo pasi numri i asistencës: 08004747 rezulton një mashtrim, ngaqë pas rënies së tij zëri përtej telefonatës të përgjigjet tekstualisht: “Numri i AMC që keni kërkuar, nuk ekziston”. Në interesim të mëtejshëm del se kjo vjen nga që sekretari i komitetit ndërsektorial, Alban Ylli, që është dhe drejtuesi i Institutit të Shëndetit Publik, pra titullari që e ka në dorë instalimin e aparatit me këtë numër, nuk e ka kryer detyrën e tij. Madje, madje në këtë Institut nuk ekziston as zyra e as personat që duhet të qëndrojnë pas këtij aparati për t’i dhënë asistencë duhanpirësve që kërkojnë të shpëtojnë nga ky ves vrasës. Fakt ky që e përforcon edhe më shumë bindjen time se thirrjet për impenjim serioz të titullarit të këtij Instituti, z. Alban Ylli, si dhe politika e zbatimit të ligjit antiduhan, me nr. 9636, dt. 06 nëntor 2006, e shpallur prej tij, është vetëm demagogji. Por është një realitet i hidhur fakti që, siç Ju kam theksuar në dy letrat e shkuara, edhe pse prodhojnë vetëm fjalë dhe parulla optimiste, administruesit e këtij Instituti vazhdojnë të përvetësojnë çdo muaj edhe një pagë shtesë për titullimin inspektor. Një pagesë që shkon nga 100 në 120 mijë lekë ( të vjetra), ndonëse nuk e ushtrojnë këtë funksion.
* Kryetar i shoqatës “Për Shqipëri pa duhan”