Ideja e Koznikut, miqësore Kosovë-Kroaci
Reprezentacioni i Kroacisë në futboll, ka gjasa të mëdha që të jetë skuadra e parë, me të cilën do të ballafaqohet Përfaqësuesja e Kosovës, menjëherë pasi që FIFA ta lejojë Federatën e Futbollit të Kosovës (FFK) të organizojë ndeshje miqësore ndërkombëtare, deri në pranimin e saj të plotë në këtë asociacion.
Kështu thotë ish-futbollisti i famshëm kosovar, Ardian Kozniku, i cili po e luan rolin kryesor rreth organizimit të kësaj ndeshje.
Kozniku, i cili aktualisht jeton dhe vepron në Kroaci, pohoi se rreth kësaj çështje ka biseduar disa herë deri më tani me drejtuesit e futbollit kroat, me të cilët thotë se ka marrëdhënie të shkëlqyeshme.
Sipas Koznikut, udhëheqësit e Federatës Kroate të Futbollit, i kanë thënë atij se me shumë dëshirë do ta zhvillonin një ndeshje miqësore ndaj reprezentacionit të Kosovës.
“Për mos me pasë probleme, kroatët po e presin pranimin e Kosovës nga FIFA, apo të paktën që FIFA ta lejojë Kosovën të zhvillojë ndeshje miqësore. Sapo të ndodhë kjo, 99.9 për qind, mos të them 100 për qind, Kosova do ta zhvillojë menjëherë një ndeshje miqësore me reprezentacionin e Kroacisë. Pra, unë garantoj se Ardian Kozniku do ta organizojë këtë ndeshje ose në Prishtinë, ose në Kroaci”, deklaroi për Express, Kozniku, i cili po qëndron për pushime në Kosovë.
“Është edhe dëshirë e imja ta shoh një ndeshje futbolli ndërmjet Kosovës dhe Kroacisë”, theksoi ish-sulmuesi i Vëllaznimit, Prishtinës, Hajdukut të Splitit, Cannes, APOEL-it, Bastias, Dinamo Zagrebit, etj.
Ish-reprezentuesi kroat, Ardian Kozniku, beson se ndeshja miqësore ndërmjet reprezentacionit kosovar dhe atij kroat do të zhvillohet në një ta ardhme jo të largët, duke u bazuar në premtimet që i ka marrë prej figurave me renome në futbollin kroat.
“Unë kam marrëdhënie të shkëlqyeshme me zyrtarët e federatës kroate. Kam kontakte të shpeshta me udhëheqësit e federatës. Të paktën një herë brenda javës takohem me ndonjërin nga udhëheqësit e Federatës, si me kryetar, sekretar etj”, tregoi ai.
“Unë edhe shumë më herët kam biseduar me trajnerin aktual, Slaven Biliç, rreth zhvillimit të një ndeshjeje miqësore ndërmjet Kosovës dhe Kroacisë, por vetëm duhet të pritet momenti i duhur. Biliç më ka thënë se do ta bëjmë gjithsesi një ndeshje me Kosovën. Ata me dëshirë dhe zemër duan të luajnë me Kosovën, dhe kjo do të ndodhë në kohë të duhur”, shtoi ai.
Kozniku pohoi se rreth kësaj çështje shumë shpejt do të bisedojë edhe me kreun e FFK-së, Fadil Vokrri, nga i cili para pak ditësh mori një mirënjohje të veçantë në ceremoninë e shpalljes së laureatëve të vitit nga FFK-ja.
“Deri më tani ende nuk kam biseduar me Vokrrin rreth kësaj çështje, por sigurisht se shumë shpejt do të diskutoj me të. Unë kam respekt për Vokrrin, i cili po punon shumë për të mirën e futbollit kosovar. Ai nuk i harron as ish-futbollistët kosovarë, duke i nderuar, sikurse që bëri në rastin tim të mërkurën”, përfundoi Kozniku.