Ilir Meta: Qeveria ka lënë pas dore tërësisht bujqësinë

Kreu i LSI-së, Ilir Meta, zhvilloi dje një takim me anëtarë dhe simpatizantë në qytetin e Lushnjës. Kryetari i Bashkisë së Lushnjës dhe anëtar i Kryesisë së LSI, Albert Sanxhaku, u shpreh se LSI është jo vetëm një forcë e re dhe një forcë e madhe, por është forca e ndryshimit, e integrimit dhe progresit. Meta, u shpreh i kënaqur që ndodhej në këtë takim, që mbahet në pallatin që mban emrin e Artistes së Popullit, "Vaçe Zela". Duke folur për projektligjin e LSI për kujdesin ndaj moshës së tretë, i cili nuk u miratua nga deputetët e mazhorancës aktuale, Meta theksoi se "pak ditë më parë pas më shumë se një viti, Kryetarja e Parlamentit, e cila shkeli të gjitha procedurat pranoi të fuste për diskutim projektligjin për kujdesin ndaj moshës së tretë të hartuar nga LSI-ja dhe sindikata e pensionistëve". Por Topalli, vijoi ai, u kujdes që kjo seancë të mos jepej nga asnjë televizion. Meta sqaroi se "qeveria jonë, e cila harxhon para pa fund për gjëra krejtësisht të panevojshme, injoron 380 mijë pensionistë, kur ndërkohë fatura financiare për këtë projektligj ishte vetëm 60 milionë dollarë", theksoi Meta. Ai u ndal edhe në gjendjen e rëndë në të cilën ndodhet sot bujqësia dhe alternativat dhe programin konkret që LSI do të ketë për të zhvilluar këtë sektor të rëndësishëm të ekonomisë shqiptare.