Integrohemi vetëm përmes kërkimit shkencor

Instituti i Energjisë, Ujit dhe Mjedisit, pranë Universitetit Politeknik të Tiranës, organizoi sot konferencën me temë "E ardhmja e ujit, burimeve të energjisë dhe mbrojtja e liqenit të Shkodrës dhe lumit të Bunës". Në këtë konferencë merrnin pjesë ministri i Arsimit dhe Shkencës, Fatos Beja, dhe përfaqësues të Akademisë së Shkencave të Malit të Zi dhe Kosovës. Ministri i Arsimit deklaroi se integrimi i kërkimit shkencor në universitete na përfshin në zonën evropiane të arsimit të lartë. Ndër përpjekjet për përfshirjen në zonën evropiane të arsimit të lartë dhe kërkimit shkencor, kreu i MASH-it ka cilësuar synimin e formimit të një gjenerate të re të diplomuarish me njohuri shkencore dhe profesionale të cilësisë së lartë, të aftë për të konkurruar në një ekonomi të hapur e në zhvillim. "Universiteteve iu bashkëngjitën disa qindra shkencëtarë e kërkues, shumë laboratorë dhe infrastrukturë tjetër kërkimore, me krijimin e 12 qendrave universitare shkencore në universitetet publike shqiptare", u shpreh ministri i Arsimit. Ndërkohë që, situata aktuale e këtyre qendrave shkencore "të tjetërsuara", përveç shkurtimit të stafeve dhe miksimit të punonjësve shkencorë të disa instituteve të dikurshme, duket se nuk ka shfaqur ndonjë risi apo rezultat tjetër.