Iran, humb jetën inspektori atomik
Një inspektor atomik nga Koreja Jugore, që punonte me Agjencinë Ndërkombëtare për Energji Bërthamore (ANEB), ka humbur jetën sot në një aksident automobilistik në Iran.
ANEB-i nëpërmjet një njoftimi tha se ishte në kontakt me familjen e inspektorit të ndjerë dhe me autoritetet e Iranit.
ANEB-i nuk ka publikuar emrin e inspektorit të vdekur në aksident, por agjencia zyrtare e lajmeve e Iranit, IRNA, e ka identifikuar atë si Seo Ok-Seok nga Koreja Jugore.
Raportohet se kolegu i tij nga Sllovakia ishte lënduar në aksident, që ndodhi afër terrenit ku gjendet një reaktor në pjesën qendrore të Iranit.
Në deklaratën e Organizatës për Energji Bërthamore të Iranit thuhet se dy ekspertë të ANEB-it, ishin në mision “në afërsi të Kompleksit Khandab në provincën Markazi, kur ndodhi aksidenti”.
Më tej thuhet se vetura me dy inspektorë kishte “rrëshqitur dhe ishte përmbysur” të martën, më 7 maj, ndërsa priten hetime intensive për zbardhjen e plotë të incidentit.
Ndërkaq inspektorët e ANEB-it janë duke monitoruar kapacitetet atomike të Iranit.