Iran, vriten 22 rebelë të PJLK-së

Televizioni shtetëror në Iran ka deklaruar se pjesëtarët e Gardës Revolucionare kanë vrarë 22 rebelë të Partisë për Jetë të Lirë të Kurdistanit gjatë një ofensive të re përgjatë kufirit veri-perëndimor me Irakun.

Oficeri i operacioneve të gardës, kolonel Hamid Ahmadi, tha se ofensiva që nisi të premten “do të vazhdojë derisa të gjithë anti-revolucionarët, rebelët dhe terroristët të jenë larguar”.
 

Mediat iraniane njoftuan, ditë më parë, që dy pjesëtarë të gardës janë vrarë në ditën e parë të ofensivës. Rebelët e PJLK-së janë përleshur vitet e fundit vazhdimisht me forcat iraniane.

Këto të fundit nisën në korrik të këtij viti një ofensivë të gjerë kundër rebelëve, duke bombarduar zonat kufitare me javë të tëra.