Ishujt Maldive njohin zyrtarisht Kosovën

Ishujt Maldive kanë njohur zyrtarisht shtetin e Kosovës. Konfirmimi ka ardhur nga ministri i Jashtëm i Maldiveve, Ahmed Shahed përmes një letre që i ka dërguar homologut kosovar Skënder Hyseni. Më herët gjatë ditës edhe kryetari i AKR-së Bexhet Pacolli njoftoi për njohjen nga ishujt Maldive. Ministri Hyseni deklaroi se meritat për njohjet që i bëhen Kosovës i kanë qytetarët dhe institucionet e vendit.Ishujt Maldive bëhen shteti i 55-të që njohin Kosovën shtet të pavarur dhe sovran. Përmes një letre të dërguar në adresë të Ministrisë së Jashtme të Kosovës, shefi i diplomacisë së shtetit Maldive njofton homologun kosovar Skender Hyseni se vendimi u mor pas shqyrtimit të rrethanave që i përkasin Kosovës dhe faktit se një numër i madh i vendeve e kanë njohur atë. Ministri Hyseni komentoi edhe vizitën e shefit të UNMIK-ut Lamberto Xanier në Beograd. Sipas tij qëndrimi i Prishtinës tashmë është i njohur se nuk e pranon planin gjashtë pikësh të Kombeve të Bashkuara dhe me Serbinë bisedon vetëm si dy shtete të barabarta. Shefi i diplomacisë kosovare tha se Serbia nuk do të ketë sukses me fushatën e saj për të penguar Kosovën në anëtarësimin në organizatat ndërkombëtare. Së shpejti sipas Hysenit Kosova do të pranohet në Fondin Monetar Ndërkombëtar dhe Bankën Botërore.