Itali, publikohet videoja e mbytjes së Costa Concordia

(I përditësuar)- Mediat italianë publikuan sot një video që tregon pamje të mbytjes së anijes Costa Concordia. Në këtë video dëgjohen anëtarët e ekuipazhit që sigurojnë pasagjerët se nuk kishte asgjë për t`u shqetësuar, edhe pse anija kishte filluar të fuste ujë.

Videoja është regjistruar nga një amator me anë të një celulari, gjatë xhirimit  shfaqet një anëtare e ekuipazhit e cila u kërkon pasagjerëve që të futen në kabinat e tyre ose të dalin një shëtitje sepse gjithçka është nënë kontroll.

Anija goditi disa shkëmbinj në brigjet e Italisë me 4.200 njerëz në bord, ku më pas filloi të mbytej. Deri tani 11 viktima janë gjetur ndërsa 21 persona të tjerë rezultojnë të zhdukur.

*********

Pasagjerët e Costa Concordia, të tmerruar si refugjatët kosovarë

Mediat italiane kanë gjetur sot një krahasim për të përshkruar gjendjen e të mbijetuarve të tragjedisë së anijes Costa Concordia, të cilët sipas medieve po kalojnë momentet më të vështira të jetës së tyre, pasi kanë përjetuar ferrin e fundosjes së anijes.

Ata janë të çoroditur. Do të duhen muaj, ndoshta vite derisa ata të shërohen nga kjo tragjedi, kështu është shprehur për agjencinë e lajmeve ANSA psikologu Stefano Milano, duke shtuar se gjendja e tyre është e ngjashme me atë të refugjatëve gjatë luftës në Kosovë .

Milano është shprehur se të mbijetuarit nuk kishin lajme për të dashurit e tyre, ndërkohë që shumë prej refugjatëve kosovarë në kohën e luftës kishin stres post-traumatik si këtu. Ajo që e bën akoma më të vështirë këtu është se në luftë njerëzit e pranojnë traumën. Banaliteti këtu e bën më të vështirë, theksoi Milano.