Izraeli kërcënon sërish. Ban ki Mun: Shpjegoni sulmet

 

Sekretari i përgjithshëm i Kombeve të Bashkuara, Ban Ki Mun, ka kërkuar që Izraeli t'i shpjegojë sulmet e tmerrshme kundër përfaqësive të OKB-së dhe dëshiron që të gjenden përgjegjësit e tyre. Në një vizitë në Rripin e Gazës, kreu i OKB-së premtoi ndihmë për palestinezët, pas sulmeve izraelite. Në luftë janë vrarë rreth 1 330 njerëz dhe janë plagosur 5 450 të tjerë. Sipas AP, bazuar nga raportet e mjekëve në Palestinë, mes viktimave gjenden 437 fëmijë nën moshën 16-vjeçare, 110 gra, 123 pleq, 14 punonjës mjekësorë dhe katër gazetarë. Ndërsa mes të plagosurve gjenden 1 890 fëmijë dhe 200 njerëz në gjendje të rëndë. Ndërkohë Izraeli është shprehur i gatshëm të hapë kufijtë në Rripin e Gazës, për furnizimin e popullsisë palestineze me ndihma. "Një hapje e përgjithshme e kufirit do të bëhet e mundur kur të jetë përjashtuar kontrabanda e armëve për Hamasin radikal islamik", tha Ministrja e Jashtme Zipi Livni, e cila kategorizoi armëpushimin e vendosur para pak ditësh, si një fazë testi. Dje autoritetet izraelite paralajmëruan se janë gati të godasin përsëri Rripin e Gazës nëse militantët e Hamasit i përdorin tunelet e nëndheshme në kufi me Egjiptin për t'u riarmatosur. Izraeli njoftoi se ka shkatërruar rreth 150 tunele gjatë ofensivës tri javore në Gaza, por raportohet se disa nga tunelet janë rihapur.