Javë e çmendur për Ferdinandin

Anton Ferdinand për herë të parë ka thyer heshtjen prej përfshirjes në atë që sipas tij ishte incident racor me kapitenin e Anglisë dhe Chelseas, John Terry.

Ai iu referua ngjarjeve të javës së fundit si “çmenduri”. Terry mohoi çfarëdo keqbërje por Federata angleze është duke hetuar incidentin. Ndërsa, Ferdinand insiston se është i përqendruar në lojën e tij për QPR-n dhe ndeshjen e ardhshme kundër Tottenhamit në vikend, por pranon se ngjarja e fundit paraqet një periudhë të pazakonshme në jetën e tij.

“Ditët e fundit kanë qenë të çmendura” tha Ferdinand për Daily Telegraph. Por, mendoj për ndeshjen e së dielës dhe jam plotësisht i përqendruar në futboll. Të gjithë ata që më njohin e dinë se pa marr parasysh çka ndodh, futbolli do të jetë gjithmonë prioriteti im numër një” shtoi ai.

Si pjesë e hetimeve të vazhdueshme, FA do të bisedojë me Ferdinandin dhe Terryn ndërsa edhe futbollistë të tjerë nga QPR dhe Chelsea mund të ftohen. “A ka qenë kjo java më e çmendur në jetën time? Ka pasur edhe situata tjera, por sigurisht është një prej tyre” përfundoi Ferdinand.