Jorida Tabaku: “Çdo përpjekje për të dëmtuar procesin zgjedhor, dëmton të ardhmen europiane të Shqipërisë”

“I kujtojmë Partisë Socialiste, se Europa nuk kërkon të shohë se kush fitoi apo kush humbi, por nëse procesi zgjedhor u zhvillua në mënyrë të ndershme, transparente dhe sipas ligjit”.
Kështu deklaroi dje kandidatja e Partisë Demokratike për këshillin bashkiak të Tiranës, Jorida Tabaku, gjatë një deklarate për shtyp.
Duke shtuar se është dakord me Partinë Socialiste se procesi i integrimit europian të Shqipërisë është jetik, ndërkohë që vazhdon procesi ligjor për të vendosur mbi rezultatin e ngushtë në zgjedhjet e Tiranës. “Çdo deklaratë e ndërkombëtarëve ka theksuar nevojën për vendime të bazuara në ligj, dhe jo sipas interesave politike. Ndërkombëtarët i kanë kërkuar të dy palëve politike, që të punojnë për të forcuar sundimin e ligjit në Shqipëri. Partia Demokratike është e angazhuar në këtë drejtim”, u shpreh Tabaku.
Sipas saj, çdo përpjekje për të dëmtuar procesin ligjor, duke ushtruar trysni ndaj kolegjit zgjedhor apo KQZ-së, në mënyrë që vendimet të merren mbi interesa politike, dhe jo bazuar në ligj, vetëm sa dëmton integrimin europian të Shqipërisë.
“Partia Demokratike beson tek Kushtetuta e Shqipërisë dhe Ligjet Ndërkombëtare, që thonë se çdo votë është e barabartë dhe se çdo votë duhet vlerësuar drejt. Përse Edi Rama vazhdon ta mjegullojë çështjen, në vend që të pranojë se ai ka frikë nga respektimi i këtyre parimeve. Sepse ai ka frikë nga vendimet e institucioneve të pavarura, nga numërimi i çdo vote, nga dëgjimi i zërit të çdo qytetari”, deklaroi më tej kandidatja e Partisë Demokratike për këshillin bashkiak të kryeqytetit, Jorida Tabaku.