Judah: “Politika në Beograd ndikon edhe në Kosovë”

Ngjarjet në Serbi mund të ndikojnë në situatën në Kosovë, në varësi se kush do ta udhëheqë qeverinë e Serbisë në të ardhmen. Kjo ka qenë deklarata e analistit britanik, Tim Judah. “Nëse është një qeveri më pro-europiane, ka shumë më pak gjasa të jenë aktivë në destabilizimin e Kosovës sesa, për shembull, një qeveri e udhëhequr nga radikalët, sepse ata do të hiqnin dorë nga Bashkimi Europian dhe nuk do ta çanin kokën nëse do të akuzoheshin për destabilizimin e Kosovës dhe prishjen e marrëdhënieve me EULEX-in dhe misionin e Bashkimit Europian”, - është shprehur Judah gjatë një interviste. Ai e ka cilësuar rënien e qeverisë së Serbisë si të një rëndësie të veçantë për të ardhmen e Serbisë nëse ajo do të drejtohet nga BE-ja ose jo, por edhe për situatën në Kosovë. Sipas Judah, pritet të shihet nëse zgjedhjet serbe do të mbahen edhe në vendbanimet serbe në Kosovë, nëse kjo do të jetë e mundur nga autoritetet kosovare pas shpalljes së pavarësisë. "A do të interpretohet kjo si një sfidë e vërtetë për sovranitetin e shtetit të ri? Nëse po, si do të zgjidhet kjo çështje? Mendoj se ky do të jetë një problem i ndërlikuar”, - u shpreh Judah. Ai është shprehur pesimist lidhur me mundësinë që autoritetet e Kosovës, por edhe misioni i BE-së të mund ta shtrinin pushtetin e tyre në komunat veriore të banuara me serbë, ku Prishtina zyrtare nuk ka pasur qasje që pas përfundimit të luftës në vitin 1999.

11 Mars 2008