KLSH: Dëmi ekonomik, 7.3 miliardë lekë, doganat e tatimet kryesojnë

Administrata publike vazhdon të abuzojë me fondet e buxhetit, duke i shkaktuar një dëm financiar shtetit në miliarda lekë. Raporti i fundit i Kontrollit të Lartë të Shtetit nxjerr në pah dëmin e madh ekonomik të shkaktuar nga administrata publike, një vlerë afro 7.3 miliardë lekësh. Ky dëm ekonomik është shkaktuar kryesisht nga administrata doganore, nga ajo tatimore, si dhe nga fondet e prokurimeve publike. Nga kontrollet e ushtruara gjatë vitit të kaluar nga ekipet e Kontrollit të Lartë të Shtetit janë zbuluar parregullsi dhe shkelje financiare, në të ardhurat dhe në shpenzimet e kryera, me dëm efektiv të përgjithshëm në shumën totale prej 7.305.656.000 lekësh. Ky dëm efektiv i përket veprimtarisë ekonomiko-financiare për periudhën kohore 2007-2008 dhe 9-mujorit të vitit 2009. Sipas raport të KLSH-së, në fushën e shitjes dhe dhënies me qira të pasurisë shtetërore, dëmi rezulton në një vlerë prej 3.190.779.000 lekësh, ku shkelës rezultojnë
Ministria e Mjedisit, Pyjeve e Administrimit të Ujërave, Tiranë, në vlerën 538.738.000 lekë, Albpetrol, sh.a. Patos, në vlerën 2.610.563.000 lekë, e cila përfaqëson moslikuidimin e faturave të shitjeve të produkteve nga ARMO sh.a. deri në fund të vitit 2008 dhe diferenca në çmim të këtyre shitjeve; Autoriteti Portual, Durrës, në vlerën 13.559.000 lekë, nga aplikimi i çmimeve të ndryshme të dhënies me qira të shesheve për subjekte private, në kundërshtim me VKM nr. 162, datë 07.03.2007, Enti Kombëtar të Banesave, Tiranë, në vlerën 5.913.000 lekë etj.