KQZ: PS e PR bllokojnë zgjedhjet
BLEDAR HOTI
Komisioni Qendror i Zgjedhjeve i bën thirrje Partisë Socialiste dhe Partisë Republikane që të mos e bllokojnë më procesin e ngritjes së Komisioneve të Zonave të Administrimit Zgjedhor. Kryetari i KQZ-së, Arben Ristani, duke iu drejtuar përfaqësuesit të PS-së në këtë institucion, Genci Gjonçajt, i kërkoi që të depozitojë sa më shpejt emrat e anëtarëve të KZAZ-ve. “Ne po bëjmë paralajmërimet, por deri tani nuk na kanë ardhur, prandaj zoti Gjonçaj kini parasysh se do të ketë kërkesa të tjera nga KQZ-ja”, deklaroi Ristani. Ndërsa mendohet se nëse ky afat shkelet, KQZ-ja të kërkojë edhe ndërhyrjen e faktorit ndërkombëtar për të zgjidhur këtë situatë ngërçi. Data 27 mars është afati i fundit i ngritjes së KZAZ-ve, por kur kanë mbetur edhe katër ditë, dy nga katër partitë që gëzojnë të drejtën e anëtarëve nuk i kanë paraqitur emrat e tyre. Sipas Ristanit, PS-ja dhe PR-ja kanë shkelur afatet kohore për propozimet e tyre, pasi afati i fundit ishte data 13 mars. Ai shtoi se pa konstituimin e këtyre komisioneve nuk mund të nisë puna për përgatitjen e zgjedhjeve. Ndërsa përfaqësuesi i PS-së, Genc Gjonçaj, ka deklaruar se brenda dy-tre ditëve do të depozitohen të gjithë emrat e anëtarëve socialistë në këto komisione. Në të gjithë vendin janë gjithsej 66 KZAZ me nga 7 anëtarë gjithsej, të cilët ngrihen me propozimet e katër partive parlamentare, PS, PR, PD dhe PSD. Demokratët dhe socialdemokratët i kanë depozituar emrat e anëtarëve. KZAZ përbëhen me nga shtatë anëtarë, ku drejtimi i tyre është ndarë në mënyrë të barabartë ndërmjet së majtës dhe së djathtës. Gjysma e KZAZ-ve do të jenë me kryetar të propozuar nga PD-ja, ndërsa në 33 të tjerat do të kenë kryetar të propozuar nga PS-ja. Socialistët në këto komisione përfaqësohen me 2 ose me 3 anëtarë, ndërsa PR-ja me nga 1 anëtar.
Udhëzimi për Policinë
KQZ-ja miratoi me konsensus udhëzimin “Për detyrat e Policisë së Shtetit dhe forcave të Ushtrisë në zgjedhjet për Kuvendin 2009”. Për pikën 4 të nenit 3 të këtij udhëzimi, nënkryetarja Dëshira Subashi ka kërkuar që në rast se do të vihen në përdorim forcat komando apo forca të tjera të ushtrisë për arsye madhore, KQZ-ja duhet të njoftohej 10 ditë përpara për këtë urdhër. Nënkryetarja e KQZ-së e lidhi këtë me faktin se duhej të njoftoheshin për një veprim të tillë, edhe pse e hodhi si një propozim alternativ. Në pikën 4 të këtij neni theksohet se, “ndalohet përdorimi i forcave komando dhe forcave të tjera të ushtrisë gjatë periudhës zgjedhore, përveçse me urdhër me shkrim të ministrit të Brendshëm dhe ministrit të Mbrojtjes, kur këto forca nevojiten për ruajtjen e objekteve të rëndësisë së veçantë, ose në zëvendësim të punonjësve të Policisë së Objekteve. Kopje e urdhrit me shkrim i dërgohet menjëherë KQZ-së”. Kryetari i KQZ-së, Arben Ristani propozoi një afat 5-ditor, i cili u miratua me konsensus. Policia speciale dhe forcat komando, SHISH, agjentët antikrim nuk do të përfshihen në zgjedhje. Vetëm punonjësit e policisë së ruajtjes së objekteve pritet të angazhohen në votimet e 28 qershorit. Po dje u miratua edhe udhëzimi për përcaktimin e rregullave që duhet të ndiqen nga kryetarët e njësive vendore për numërimin e zonave të qendrave të votimit në mënyre unike në shkallë vendi. Numërimi i zonës së qendrës së votimit do të bëhet me anë të një numri katërshifror. Në të gjithë Shqipërinë parashikohet që të ngrihen 4724 KQV. Numri i fundit i KQV do të jetë në komunën Xarë.
Institucionet
Miratohet udhëzimi për detyrat e policisë në zgjedhjet parlamentare të vitit 2009
Në të policia dhe ushtria për çdo veprim të sajin për forcat speciale dhe komando duhet të njoftojë KQZ-në 5 ditë përpara
Miratohet udhëzimi për sistemin unik të Komisioneve të Qendrave të Votimit
Numërimi i zonës së qendrës së votimit do të bëhet me anë të një numri katërshifror, që nis nga KQV 0001 të Gruemirës dhe përfundon në komunën Xarë