Kapteri i ushtrisë në bandën e trafikut

 

TIRANE - Një Kapter i Forcave Ajrore u arrestua dje nga oficerët e Antitrafiqeve të Tiranës, me akuzën e dhënies ndihmë për kalim të paligjshëm të kufirit ndaj personave të trafikuar në Greqi. Policia tha se gjatë operacionit të koduar “Kapshtica” në pranga kanë përfunduar edhe dy ndihmësit e ushtarakut në trafikun e klandestinëve. Hetimet ndaj të arrestuarve kanë nisur disa muaj më parë. Pas mbledhjes së provave, dje policia ekzekutoi vendimet e Gjykatës së Tiranës, e cila më 5 nëntor vendosi masën “arrest me burg” për ushtarakun Bilal Aliaj, 31 vjeç, si dhe bashkëpunëtorët e tij, 32-vjeçarin Kreshnik Dunga e Bashkim Brahimin, 22 vjeç, të gjithë banues në Kamëz të kryeqytetit. Specialistët e Antitrafiqeve përgjatë tre muajve, dokumentuar implikimin e të arrestuarve në të paktën tri raste në periudhën shtator-tetor, kur ata kanë trafikuar klandestinë, nga Tirana, në drejtim të Korçës e më pas në Greqi. Kalimi i kufirit është bërë nëpërmjet pikës së Kapshticës. Hetuesit dyshojnë se të arrestuarit mund të kenë kaluar ilegalisht në kufi edhe të paktën 40 personave të tjerë.                                        e.d