“Katari të vlerësojë potencialet e jashtëzakonshme të Shqipërisë”

Kryetarja e Kuvendit Jozefina Topalli takohet me Sheikun Hamad Bin Khalifa Al Thani  

Kryetarja e Kuvendit Jozefina Topalli u takua mbrëmjen e djeshme me Emirin e Katarit, Sheikut  Hamad Bin Khalifa Al Thani, i cili viziton për herë të parë Shqipërinë. Kryetarja e Kuvendit, duke i uruar mirëseardhjen, e cilësoi këtë vizitë si historike dhe si një moment të rëndësishëm në intensifikimin e marrëdhënieve dypalëshe. Ardhja e Emirit të Katarit Sheikut  Hamad Bin Khalifa Al Thani, në Shqipëri, është në vijim të vizitave të nivelit më të lartë që kanë kryer autoritetet zyrtare, vitet e fundit. Emiri i Katarit  Sheiku  Hamad Bin Khalifa Al Thani, shprehu kënaqësinë e veçantë për vizitën në Shqipëri dhe rikonfirmoi bashkëpunimin shumë të mirë midis dy popujve dhe vendeve tanë. Duke shprehur mirënjohje për mbështetjen që Katari i ka dhënë Shqipërisë, Kryeparlamentarja  Jozefina Topalli theksoi se, vizita e Emirit të Katarit inkurajon në mënyrë të ndjeshme edhe më tej,  klimën për ardhjen e investitorëve nga vendi tij. Kryetarja e Kuvendit shprehu falënderimet për mikpritjen që iu bë gjatë vizitës në Katar në vitin 2008 dhe vlerësoi zhvillimin e progresin e jashtëzakonshëm të këtij vendi,  vitet e fundit. Në fokus të bisedës mes Kryetares së Kuvendit dhe Emirit të Katarit Sheiku  Hamad Bin Khalifa Al Thani, ishin mundësitë e forcimit të marrëdhënieve ekonomike, duke evidentuar hapësirat, që ekzistojnë për këtë bashkëpunim me interes reciprok. Kryetarja e Kuvendit ftoi Emirin e  Katarit për të vlerësuar potencialet e jashtëzakonshme që vendi ynë ka veçanërisht për zhvillimin e turizmit malor dhe bregdetar. Kryetarja e Kuvendit theksoi se Shqipëria ka tregues pozitivë të stabilitetit makroekonomik dhe po zbaton politika të suksesshme ekonomike, ku vuri në dukje sistemin elektronik të taksave, transparencën dixhitale dhe reforma të liberalizimit të taksave. “Vendi ynë, u shpreh Kryetarja e Kuvendit edhe pse gjendet në një rajon të prekur  nga kriza ekonomike, vazhdon të ketë një rritje të qëndrueshme prej 4 për qind”. Nga ana e tij Emiri i Katarit theksoi se Shqipëria, me një pozitë të veçantë gjeografike në rajon, ka burime të mëdha për investime të konsiderueshme. Kryetarja e Kuvendit ftoi Emirin e Katarit të inkurajojë më tej bashkëpunimin mes dy parlamenteve, si rruga më e drejtpërdrejtë e afrimit mes popujve dhe vendeve tona. Emiri i Katarit, Sheikut  Hamad Bin Khalifa Al Thani, ftoi Kryetaren e Kuvendit për një vizitë në vendin e tij, ftesë e cila u pranua me kënaqësi të veçantë nga Jozefina Topalli. Katari është një nga vendet më të zhvilluara të Gjirit Persik, si dhe një nga prodhuesit më të mëdhenj të naftës dhe të gazit  në botë.