“Kërkesa e PD pranohet pjesërisht”

 

KQZ miratoi dje pjesërisht kërkesën e PD-së për përfshirjen në rezultatin përfundimtar të dy qendrave në Shkodër, 0211 (komuna Bushat) dhe 0342 (komuna Guri i Zi) të cilat ishin konsideruar si të pavlefshme nga KZAZ-ja 41. Për sa i përket kutisë së QV 0211 nuk ishte numëruar me argumentin se nuk ishte mbyllur si duhet dhe mund të hynte dora brenda në kuti, por pas inspektimit në KQZ doli e kundërta. Ndërsa kutia e dytë ishte konsideruar e parregullt për shkak se në kuti ndodheshin më shumë fletë votimi se sa firma të votuesve, që kishin marrë pjesë në zgjedhje kishte në listën e zgjedhësve. Qendra 0211 pasi u hap rezultoi me 278 vota për PD dhe 38 për PS dhe u pranua nga të gjashtë anëtarët e KQZ-së, ndërsa kutia e dytë rezultoi me pesë vota më shumë se numri i firmave në fletën e votimit dhe u miratua me 4 vota pro dhe dy kundër, por për shkak se për këtë vendim duhen pesë vota pro, ajo nuk do të pasqyrohet në rezultatin përfundimtar të qarkut Shkodër.