Kidnapohet babai i Mikelit

John Obi Mikel luajti për Chelsean të dielën, edhe pse u informua se babai i tij ishte rrëmbyer.

Mesfushori nigerian ishte i vetëdijshëm se babai i tij ishte kidnapuar në vendlindjen e tij, por pranoi të paraqitet në barazimin pa gola kundër Stoke Cityt, të dielën. Michael Obi, i cili udhëheq një kompani transportuese ndërshtetërore në Jos, është zhdukur të premten.

Përpjekje të ndryshme për të kontaktuar me të nuk kanë sjellë rezultate, pasi celulari i tij nuk ka qasje nga e shtuna. Përfaqësuesit e Mikelit, Sport Entertainment dhe Media grup e njoftuan futbollistin për ngjarjen dhe i lanë atij të vendosë rreth përfshirjes së tij në Britannia Stadium.

“SEM konfirmon se babai i klientit tonë, John Obi Mikel është rrëmbyer në Nigeri, të premten, 10 gusht. Deri më tani, nuk është marrë asnjë kërkesë për çfarëdo forme të shpërblimit për lirimin e tij. Mikel ishte informuar nga menaxheri i tij para ndeshjes Stoke – Chelsea dhe vendosi të luajë për të mos e zhgënjyer klubin dhe familjen e tij”, thuhej në komunikatën nga SEM-i.

Mikel nuk është futbollisti i parë nga Premierliga të cilit i është rrëmbyer një familjar në Nigeri. Në korrik 2008, vëllai më i madh i mbrojtësit të Evertonit, Joseph Yobo ishte kidnapuar në Port Harcourt. Nornu Yobo ishte liruar 10 ditë më vonë, por nuk dihej nëse ishte dhënë ndonjë shpërblim.