Klinton nis turneun në Lindjen e Mesme

Administrata e re flet për angazhim në ndërtimin e një shteti palestinez
Hillari Klinton takohet me udhëheqësit kryesorë izraelitë, në kuadër të misionit të saj të parë në Lindjen e Mesme, si Sekretare Shteti e administratës së Presidentit Obama. Në program janë takimet me presidentin e Izraelit, Shimon Peres dhe bisedimet e veçuara me ministren e jashtme, Tzipi Livni dhe Binyamin Netanyahun, që është caktuar për krijimin e qeverisë së re izraelite. Zonja Klinton pritet të shkojë të mërkurën në Bregun Perëndimor për bisedime me presidentin palestinez, Mahmoud Abbas.
Sekretarja Klinton ka këmbëngulur se administrata e re amerikane është e angazhuar për ndërtimin e një shteti palestinez. Por ajo ka mbërritur në një pejsazh që një diplomat perëndimor e përshkroi si të trishtë. Vetë palestinezët janë thellësisht të përçarë, ndërsa Izraeli duket se po përgatitet për një qeveri të dobët djathtiste, armiqsore ndaj një shteti palestinez.