Kombëtarja e Han barazon skuadrën e Brigelit
Kjo, edhe prej deklaratave optimiste të trajnerit Ari Han, në prag të sfidës në “Ta’ Qali”. Pavarësisht zhgënjimit, nëse ecuria e kuqezinjve shihet në tërësi, statistikat tregojnë se skuadra e drejtuar nga “tulipani” nuk është për t’u hedhur poshtë.
Përkundrazi, në pesë ndeshjet e para eliminatore ajo ka grumbulluar të njëjtin numër pikësh me Kombëtaren e drejtuar nga Hans Peter Brigel, që në eliminatoret e Botërorit 2006 vendosi rekordin për pikë të grumbulluara në aktivitetet zyrtare: 13 në total, në një grup ku si kundërshtar kishim Ukrainën, Turqinë, Danimarkën, Greqinë, Gjeorgjinë dhe Kazakistanin.
Ashtu si në eliminatoret e mëparshme të Kupës së Botës, Shqipëria ka grumbulluar gjashtë pikë pas pesë ndeshjesh, duke marrë 40 për qind të pikëve të mundshme.
Më e keqe ka qenë ecuria e strategut Oto Bariç, që në pesë ndeshjet e para të eliminatoreve të Euro 2008, arriti vetëm 3 pikë nga 15 që ishin në lojë (pra vetëm 20 për qind). Gjithsesi, statistikat pozitive për skuadrën e Han nuk ndalen me kaq. Për t’u vlerësuar është edhe mbrojtja solide (edhe pse ndonjëherë e ndihmuar nga fati) e rreshtuar Ari Han, e cila ka bërë që të humbasim vetëm një nga pesë ndeshjet e para.
Mbrojtja
Ajo që është për t’u vlerësuar nga përfaqësuesja aktuale është puna e mirë me repartin difensiv. Në fakt, pas pesë ndeshjeve të para zyrtare, Ari Han e sheh veten në pozita më të mira se dy paraardhësit e tij, Bariç dhe Brigel. Skuadra e 60-vjeçarit ka humbur vetëm një takim: 2-0 në “Ferenc Pushkash” me Hungarinë.
Ndërkohë, Bariç kishte humbur dy nga pesë ndeshjet e para, ato kundër Rumanisë dhe Holandës, ndërsa Brigel regjistroi tri humbje në eliminatoret e Botërorit 2006 (me Gjeorgjinë, Danimarkën dhe Ukrainën). Han “mposht” dy paraardhësit edhe me numrin e pakët të golave që kuqezinjtë kanë pësuar, në ndeshjet e para pas emërimit si trajner i Shqipërisë.
Prej janarit 2008, kur “tulipani” u emërua në krye të stolit, në tetë ndeshje (duke llogaritur edhe miqësoret) Shqipëria ka pësuar vetëm katër gola, e thënë në gjuhën e shifrave 0.5 gola në ndeshje, kundrejt 1.25 golave të pësuar në çdo 90 minuta me Bariçin dhe 1.75 golave në kohën e Brigelit. Mbrojtja është paraqitur mirë edhe në ndeshjet eliminatore, ku ka lejuar vetëm në dy raste prekjen e rrjetës (në Hungari), edhe pse kemi luajtur kundër dy prej skuadrave më të forta në kontinent: Suedisë dhe Portugalisë.
Në Botërorin 2010, Shqipëria ka pësuar më pak se gjysmë goli në ndeshje (më saktësisht 0.4). Në të njëjtën periudhë kohe, me Bariç mbrojtja ishte dukshëm më e dobët, pasi kishte pësuar gjashtë rrjeta në 450 minuta, më saktësisht 1.2 gola në ndeshje. Me Brigelin statistikat ishin edhe më të këqija, pasi në pesë ndeshjet e para eliminatore, ato të Euro 2004, skuadra kishte pësuar 9 gola, pra 1.8 në ndeshje. Por nën drejtimin e të njëjtit trajner, në Eliminatoret e Botërorit 2006 kemi pësuar 7 gola në 5 ndeshje, saktësisht 1.4 gola për ndeshje
Problemi
Handikapi kryesor i skuadrës së drejtuar nga Ari Han është mungesa e golave. Në tetë ndeshjet e para, Shqipëria ka shënuar 6 gola, pra në total 0.75 gola në ndeshje.
Në pesë sfida eliminatore. kemi përshëndetur rrjetën vetëm tri herë, me mesatare 0.6 rrjeta. Në këtë aspekt, statistikat e Bariç dhe Brigel ishin më të mira.
Të besuarit e “Oto Maksimal” shënonin 7 gola në tetë takimet e para (0.875 gola në ndeshje), ndërkohë që mesatarja në pesë takimet eliminatore ishte e njëjtë, pra 0.6 gola. Skuadër tejet ofensive ishte ajo “brigeliane”: 12 gola në tetë përballjet e para (1.5 gola në ndeshje) dhe gjashtë rrjeta në pesë takimet e para të vlefshme për Euro 2004, aktivitet ku u regjistruar fitorja 3-1 me Rusinë në Shkodër, pra 1.2 gola në ndeshje.