Komisioni për Veprimtaritë Prodhuese, Tregtinë dhe Mjedisin merr në shqyrtim projektligjin Për autoritetin e aviacionit civil.

Komisioni për Veprimtaritë Prodhuese, Tregtinë dhe Mjedisin, në mbledhjen e datës 21.1.2010, në orën 11:00, filloi shqyrtimin e   projektligjit: Për autoritetin e aviacionit civil.
 
Ishin  të  pranishëm në mbledhje përfaqësuesit  e Ministrisë së Punëve Publike, Transporteve dhe Telekomunikacioneve:  Lilika Radovicka, Feliks Baci dhe Ervin Minarolli.
 
Fillimisht u dëgjuan shpjegimet e relatorit të komisionit për këtë projektligj. Ai shpjegoi se  ky projektligj  i propozuar nga MPPTT ka për qëllim   të përcaktojë organizimin dhe funksionimin  e Autoritetit të Aviacionit Civil në Republikën e Shqipërisë.  Krijimi i Autoritetit të Aviacionit Civil është  rekomandim i Këshillit të Evropës dhe me krijimin e tij,  pushon së vepruari  Drejtoria  e Përgjithshme  e Aviacionit Civil dhe  të gjitha kompetencat e saj i merr Autoriteti.
Ky projektligj është një hap për përafrimin e legjislacionit të kësaj fushe me  atë të vendeve të BE-së,  do të ndikojë në  rritjen e kapaciteteve  institucionale  me qëllim   rritjen e  standardeve të sigurisë të transportit ajror.  Relatori i komisionit  u shpreh dakort në parim   me projektligjin dhe ftoi deputetët ta miratojnë.
 
Më tej, u dëgjuan shpjegimet  e  përfaqësuesve të ministrisë dhe u vijua me  pyetjet e deputetëve.
Shqetësimet  kryesore  të anëtarëve të komisionit ishin:
-Të gjendet termi i përshtatshëm  për termin licencim  në nenin 3.
-Në nenin 7, pikat b, c dhe dh, të rishihen  për tu përputhur me  nenet  në vazhdim të projektligjit, përsa i përket kompetencave.
-Neni 18 të bashkohet me nenin 17.
-Të përputhen  pika 2 me pikën 3,  të nenit 17.
- Të rishihen  afatet tek neni 27.
 
Projektligji u miratua në parim. Shqyrtimi nen për nen i projektligjit do të vazhdojë në mbledhjen e ardhshme të komisionit,  pasi të përfaqësuesit e ministrisë të  reflektojnë për  çështjet e mësipërme.