Komisioni për Veprimtaritë Prodhuese, Tregtinë dhe Mjedisin miraton dy projektligje
Komisioni për Veprimtaritë Prodhuese, Tregtinë dhe Mjedisin, në mbledhjen e datës 3 shtator 2008, shqyrtoi projektligjet:
1. Për disa ndryshime dhe shtesa në ligjin nr.8934, datë 5.9.2002, Për mbrojtjen e mjedisit, të ndryshuar.
2. Për ratifikimin e memorandumit të mirëkuptimit, ndërmjet Republikës së Shqipërisë dhe Komunitetit Evropian, për pjesëmarrjen e Republikës së Shqipërisë në programin e komunitetit Programi i veçantë për sipërmarrjen dhe novacionin (EIP), të programit kuadër të konkurueshmërisë dhe novacionit, 2007-2013.
Gjatë shqyrtimit të projektligjit të parë, ishin të pranishëm në mbledhje përfaqësuesit e Ministrisë së Mjedisit, Pyjeve dhe Administrimit të Ujërave, Gramoz Zelo dhe Madalena Koja. Ata shpjeguan se këto ndryshime vijnë në kuadër të reformës rregullatore me qëllim ndihmën e biznesit vendas dhe të huaj, duke shkurtuar afatet e pajisjes së subjekteve me leje mjedisore, deklaratë mjedisore, autorizim dhe pëlqim mjedisor. Gjithashtu, projektligji dyfishon masën e gjobës për subjektet që ndotin, ose dëmtojnë mjedisin. Pas diskutimeve, Komisioni e miratoi në parim, nen për nen dhe në tërësi projektligjin.
Përsa i përket projektligjit të dytë, u theksua se kjo marrëveshje nënshkruhet në zbatim të marrëveshjes kuadër ndërmjet Republikës së Shqipërisë dhe Komunitetit Evropian për parimet e përgjithshme të pjesëmarrjes së saj në programet e komunitetit. Qëllimet specifike të programit EIP janë:1. Të forcojë konkurrencën e ndërmarjeve, në veçanti të SME-ve
2. Të promovojë të gjitha format e inovacionit.
Një objektiv tjetër i programit është krijimi i rrjetit të qendrave informuese në nivel evropian, duke paraqitur një lidhje ndërmjet institucioneve evropiane dhe aktorëve vendorë.
Detyrimet financiare të Shqipërisë për zbatimin e Memorandumit do të përballohen në masën 75% nga instrumenti i asistencës komunitare CARDS 2005, dhënë Shqipërisë dhe në masën 25%, do të përballohen nga Buxheti i Shtetit.
Institucioni përgjegjës për zbatimin e këtij memorandumi është Ministria e Ekonomisë, Tregtisë dhe Energjitikës.
Në përfundim, anëtarët e Komisionit e miratuan në parim projektligjin dhe u shprehën dakord për kalimin e tij për miratim në seancë plenare.
(Për më shumë informacion kontaktoni me zyrën e Komisionit në numrin: + 355 4 27 82 93).