Komisioni për Veprimtaritë Prodhuese, Tregtinë dhe Mjedisin shqyrton ligjin për pyjet
Komisioni për Veprimtaritë Prodhuese, Tregtinë dhe Mjedisin, në mbledhjen e datës 8.9.2008, shqyrtoi projektligjin: Për disa ndryshime në ligjin nr.9385, datë 4.05.2005, Për pyjet dhe shërbimin pyjor, të ndryshuar.
Ishin të pranishëm në mbledhje përfaqësuesit e Ministrisë së Mjedisit, Pyjeve dhe Administrimit të Ujërave Hasan Cani, Pëllumb Abezhi, Bajram Ejdiaj dhe Nehat Çollaku.
Ata shpjeguan se ky ndryshim vjen në kuadër të reformës rregullatore. Projektligji propozon që subjektet që duhet të licensohen parashikohet t`i nënshtrohen procedurave të konkurrimit publik, i cili organizohet dhe realizohet nga drejtoritë e shërbimit pyjor, ose njësitë e qeverisjes vendore për pyjet komunale. Me subjektin fitues lidhet kontrata për dhënien në përdorim për trajtimin, ose shfrytëzimin e fondit pyjor. Rregullat e pjesëmarrjes në konkurrim dhe kërkesat përcaktohen me udhëzim të Ministrit të Mjedisit, Pyjeve dhe Administrimit të Ujrave. Projektligji rrit konkurencën dhe transparencën dhe nuk ka efekte financiare.
Pas diskutimeve, anëtarët e Komisionit e miratuan në parim projektligjin dhe u shprehën dakord për kalimin e tij për miratim në seancë plenare. Gjatë shqyrtimit nen për nen, u bë ndryshim në nenin 1 të projektligjit. Përfaqësuesit e Ministrisë u shprehën dakord me këtë ndryshim.
(Për më shumë informacion kontaktoni me zyrën e Komisionit në numrin: + 355 4 27 82 93).