Komisioni për Veprimtaritë Prodhuese, Tregtinë dhe Mjedisin, shqyrtoi projektligjin "Për administraten detare".
Komisioni për Veprimtaritë Prodhuese, Tregtinë dhe Mjedisin, në mbledhjen e datës 10.3.2009, në orën 10 00, filloi shqyrtimin e projektligjit: "Për administraten detare".
Ishin të pranishëm në mbledhje: përfaqësuesit e Ministrisë së Punëve Publike, Transporteve dhe Telekomunikacioneve: Shkëlqim Xhaxhiu, Sokol Kapedani, Dorian Mersini, si dhe deputeti Osman Metalla.
Fillimisht, komisioni dëgjoi shpjegimet e zotit Osman Metalla si specialist i kësaj fushe.
Ai shpjegoi se projektligji është përgatitur në përputhje të plotë me kërkesat e Konventës së Organizatës Ndërkombëtare Detare, Memorandumit të Parisit dhe me Kodin Ndërkombëtar të Sigurisë në Porte dhe në Anije. Ky projektligj është një hap para në përmbushjen e detyrimeve që rrjedhin nga Plani Kombëtar për zbatimin e MSA-së.
Projektligji është përgatitur me ndihmën e konsulencës së huaj duke marrë parasysh eksperiencën e vendeve të rajonit, si dhe zhvillimet e vendit.
Projektligji përmban në parim organizimin edhe funksionimin e administratës detare me të gjitha strukturat drejtuese dhe ekzekutuese të saj. Qëllimi kryesor i projektligjit është krijimi i një strukture sa më efektive me një faturë minimale financiare. Efektet financiare të projektligjit do të përballohen nga MPPTT.
Pas diskutimeve, deputetët u shprehën dakord në parim për kalimin e këtij projektligji për miratim në seancë plenare.
Gjatë shqyrtimit nen për nen, u bënë vërejtje dhe redaktime për nenet: 2, 3 dhe 13.
Për nenet: 8. 9, 10, 11, 12, 16, u kërkua mendimi i Komisionit të Ligjeve.
Tiranë, më 10.3.2009
(Për më shumë informacion kontaktoni me zyrën e komisionit në numrin: + 355 4 22 78 293).