Komisioni për Veprimtaritë Prodhuese, Tregtinë dhe Mjedisin shqyrton nen për nen projektligjin Për ratifikimin e protokollit II shtesë, Për përkufizimin e konceptit Produkte origjinuese dhe metodat e bashkëpunimit ekonomik

  Komisioni për Veprimtaritë Prodhuese, Tregtinë dhe Mjedisin, në mbledhjen e datës 24.11.2009, në orën 11:00, shqyrtoi nen për nen projektligjin Për ratifikimin e protokollit II shtesë, Për përkufizimin e konceptit Produkte origjinuese dhe metodat e bashkëpunimit ekonomik, që zëvendëson protokollin me të njëjtin numër, të Marrëveshjes së Tregtisë së Lirë, ndërmjet Republikës së Shqipërisë dhe Republikës së Turqisë".   Ishin të pranishme në mbledhje: përfaqësuesja e Ministrisë së Ekonomisë, Tregtisë dhe Energjetikës, Oriela Pazaj dhe përfaqësuesja e Ministrisë së Integrimit, Hilda Mezini.   Fillimisht u dëgjua  relatori i Komisionit për këtë projektligj, deputeti  Gëzim Dibra. Ai shpjegoi se ky protokoll siguron kumulimin dypalësh të origjinës së mallrave në shkëmbimet tregtare ndërmjet Republikës së Shqipërisë dhe asaj të Turqisë. Marrëveshja e  Tregtisë së Lirë  me vendet e CEFTA-s 2006, parashikon kumulimin diagonal  të origjinës, jo vetëm  ndërmjet  vendeve të CEFTA-s, por dhe me Turqinë, BE-në dhe  vendet e EFTA-s.   Marrëveshja e Stabilizim-Asociimit me BE-në parashikon kumulimin diagonal të origjinës edhe ndërmjet vendeve të CEFTA-s, të përfshira  në procesin e  Stabilizim Asociimit, si dhe me Turqinë. Kjo ishte arsyeja e ndryshimit dhe harmonizimit të rregullave në MTL-në me Turqinë.   Më 30.7.2009 Komiteti i Përbashkët Shqipëri-Turqi vendosi të ndryshojë protokollin ekzistues të rregullave të origjinës dhe të bashkëpunimit doganor të Marrëveshjes së Tregtisë së Lirë, ndërmjet Republikës së Shqipërisë dhe Republikës së Turqisë.   Protokolli i ri përmban edhe disa  ndryshime teknike  të cilat synojnë  korrigjimin e disa  parregullsive  ndërmjet versioneve të ndryshme gjuhësore në tekst.   Protokolli i ri do të ndihmojë eksportuesit tanë për të përdorur lëndë të para si nga Bashkimi Europian dhe nga Turqia. Institucionet përgjegjëse për zbatimin e këtij protokolli  janë  Ministria e  Ekonomisë, Tregtisë dhe Energjetikës dhe Ministria e  Financave.   Pas diskutimeve, Komisioni e miratoi projektligjin dhe u shpreh unanimisht dakord që ai të kalojë për miratim në seancë plenare.