Komisioni për Veprimtaritë Prodhuese, Tregtinë dhe Mjedisin shqyrton projektligjin Për aderimin e Republikës së Shqipërisë në protokollin Për menaxhimin e integruar të zonës bregdetare në Mesdhe të Konventës së Barcelonës, Për mbrojtjen e mjedisit d

Komisioni për Veprimtaritë Prodhuese, Tregtinë dhe Mjedisin, në mbledhjen e datës 28.1.2010, në orën 11:00, shqyrtoi   projektligjin: Për aderimin e Republikës së Shqipërisë në protokollin Për menaxhimin e integruar të zonës bregdetare në Mesdhe të Konventës së Barcelonës, Për mbrojtjen e mjedisit detar dhe të rajoneve bregdetare të Mesdheut.
 
Ishin  të  pranishëm në mbledhje përfaqësuesit  e Ministrisë së  Mjedisit, Pyjeve dhe  Administrimit të Ujrave: Bajram Ejdiaj dhe Laureta Dibra.
 
Fillimisht u dëgjua relatori i komisionit për këtë projektligj, deputeti Besnik Dusha.  Ai shpjegoi se vendi ynë është anëtar në Konventën e Barcelonës  Për mbrojtjen e mjedisit detar dhe të rajoneve bregdetare të Mesdheut që prej vitit 2001.  
 
Në kuadër të kësaj konvente janë dhe gjashtë protokolle  prej të cilave, janë ratifikuar vetëm  katër. Ky protokoll që vjen për ratifikim në Kuvend   synon të ruajë  dhe të përdorë  në funksion të  zhvillimit të qëndrueshëm zonat bregdetare të  Detit Mesdhe si  natyrë e përbashkët dhe me trashëgimi kulturore. Protokolli kërkon një kuadër  të  përbashkët masash  prej organeve të qeverisjeve vendore përkatëse për menaxhimin e integruar  të zonës bregdetare në Mesdhe.
 
Për shtetet anëtare lindin detyrime për hartimin e strategjive për menaxhimin e mjedisit detar,  zonave bregdetare,  hartimin e planeve e projekteve për menaxhimin  e integruar të tyre.
 
Zbatimi  i këtyre masave  mbart një kosto financiare  që do të planifikohet çdo vit në përputhje me  masat, angazhimet  dhe detyrimet konkrete që do të kenë organet shtetërore në zbatim të këtij protokolli. Institucioni përgjegjës  për zbatimin e këtij protokolli  është Ministria e Mjedisit, Pyjeve dhe  Administrimit të Ujrave.
 
Ai e ftoi komisionin ta miratojë në parim këtë  marrëveshje, sepse ajo është plotësisht në përputhje  me përparësitë e Qeverisë për menaxhimin e mbrojtjen e  zonës bregdetare.
 
Në përfundim të diskutimeve, Komisioni e miratoi në parim projektligjin dhe u shpreh unanimisht dakort që ai të kalojë për miratim në seancë plenare.