Kompleksi stervitor i klubit te futbollit te Tiranes me sistem ndricimi

Futbollistë të panumërt i zënë vendin njeri-tjetrit sa hap e mbyll sytë në dy fushat me bar sintetik në kompleksin e klubit të futbollit të Tiranës. Ky trafik do të lehtësohet jo pak pasi në “Skënder Halili” të vendoset sistemi i ndriçimit, sistem i cili do të mundësojë stërvitje të shtrira në një hark kohor shumë më të gjatë, pavarësisht nëse dielli do të jetë në qiell, qoftë i mbuluar edhe me re, apo do të ketë zbritur për të pushuar.

Kullat metalike janë sjellë në mjediset e kompleksit bardheblu dhe besohet se shpejt do të vendosen në të katër këndet e fushës kryesore me bar artificial, fushë që ndodhet përmbi dy të tjerat, por do të ketë ndriçimin e saj edhe fusha më e vogël, ku zakonisht stërviten ekipet zinxhir të moshave.

Pa asnjë dyshim, ky investim i bashkisë së kryeqytetit do të jetë ndihma e dytë e madhe për klubin bardheblu, pas ndihmës së parë që iu dha me ndërtimin e fushave të reja, një investim i Federatës Shqiptare të Futbollit (FSHF) dhe pushtetit vendor në të kaluarën.

Ky do të jetë sistemi i dytë i ndriçimit që do të vendoset në një kompleks të kryeqytetit, pas atij që u instalua në kompleksin e sotëm të ekipeve kombëtarë, ish-kompleksi Dinamo, që tani administrohet nga Agjencia e Shërbimeve të Sportit.

Siç është edhe ligji i pashkruar njerëzor, kjo tendencë do të pushtojë shumë shpejt edhe qytetet e tjerë të Shqipërisë.