Kompozitori Thoma Simaku në Festivalin e Pranverës në Angli

Kompozitori shqiptar Thoma Simaku, i cili prej vitesh jeton në Britaninë e Madhe, do të jetë pjesë e programit në Festivalin e Pranverës, që u hap të enjten në Angli. Simaku, i vlerësuar në vitin 2009 si “kompozitori i vitit” në Britani, përfaqësohet me një vepër me motive shqiptare. Është premiera e pjesës “Fluturimi i shqiponjës”, që do të interpretohet nga pianisti i ri Joseph Houston, i cili studion me Ashley Wass në Kolegjin Mbretëror të Muzikës në Londër. Mes të tjerëve, në program janë kompozitorë mjaft të njohur të shekullit XX, si Berio (1925-2003), Kurtag (1926) dhe Ligeti (1923-2006), si edhe William Brooks, kompozitor amerikan, profesor në Universitetin e York-ut. Këtë pjesë Thoma Simaku e ka kompozuar fillimisht në vitin 2000 dhe prej asaj kohe është luajtur disa herë në Angli, Amerikë, Itali dhe në Kosovë nga pianisti anglez Ian Pace dhe pianistja japoneze Noriko Kawai.