Kontrata për tritolin e Durrës-Kukës,“Nitromak” padi Ministrisë së Mbrojtjes

 

TIRANE – Kompania “Nitromak” do vazhdojë të shfrytëzojë ambientet e repartit ushtarak të Borizanës së Krujës, për të magazinuar tritolin e importit, që përdoret për ndërtimin e rrugës Durrës – Kukës. Kjo ishte kërkesa e firmës turke, depozituar dy ditë më parë në Gjykatën e Tiranës, kundër Ministrisë së Mbrojtjes, ku pretendohej se prishja e kontratës me “Nitromak” ishte bërë në një moment të pafavorshëm. Firma që furnizon me tritol ndërtuesit e rrugës Durrës–Kukës, iu drejtua Gjykatës së Tiranës ku kërkoi sigurimin e padisë, në ngarkim të Ministrisë së Mbrojtjes, ose e thënë ndryshe të vazhdojë të shfrytëzojë ambientet e repartit ushtarak të Borizanit të Krujës për magazinimin e tritolit të importuar. “Nitromak” ka nënshkruar në janar të këtij viti një kontratë për shfrytëzimin e një magazine 200 metër katrorë në repartin e Borizanës, për të magazinuar tritolin kundrejt një qiraje të caktuar. Por, arrestimi i katër personave të akuzuar për përfshirje në afera korruptive, përsa i përket dhënies së licencës kësaj firme, si dhe favorizimi për qira të ulët, bëri që më datë 12 gusht Ministria e Mbrojtjes të prishte kontratën me firmën “Nitromak”. Pasi ka kaluar të gjitha procedurat administrative dhe ka dështuar në rikthimin e marrëveshjes, firma i është drejtuar Gjykatës së Tiranës, ku fillimisht kërkoi sigurimin e padisë, derisa çështja të zgjidhet në një proces gjyqësor, që pritet të nisë në majin shtator, pas rikthimit të togave të zeza nga pushimet verore.        fa.ma.