Kosova, 5.7 milione euro per imazhin

Shteti me i ri financon miliona euro, per permiresimin e imazhit te tij ne diplomacine boterore. Kompania reklamuese "Saatchi & Saatchi", fituese e tenderit ne vlere prej 5.7 milione euro, do te drejtoje fushaten per permiresimin e imazhit te Kosoves ne bote. Autoritetet thone se pas pavaresise, Kosova ka nevoje per nje imazh te ri, me te cilin do te njihet. Kompania "Saatchi & Saatchi", sipas autoriteteve ne Kosove, do te drejtoje fushaten "Realizimi i rritjes se imazhit te shtetit dhe fushates nderkombetare mediale per Republiken e Kosoves". Sekretari i perhershem ne Ministrine e Ekonomise dhe Financave, Bashkim Isufi, deklaroi dje se Kosova pas pavaresise, ka nevoje per nje imazh te ri ne bote. Ne fakt, sipas tij, eshte qendrim i qeverise se Kosoves qe ato te punojne dhe te gjejne rruge te pershtatshme, ne menyre qe te ndikojme ne ngritjen e imazhit te Kosoves ne cdo aspekt. "Duke i analizuar keto kerkesa, e sidomos pas pavaresise se Kosoves dhe nevojes qe Kosova te zere vendin e merituar ne arenen nderkombetare ne fusha te ndryshme, kemi menduar qe angazhimi i nje kompanie te tille, do te kishte ndihmuar dukshem ne ngritjen e imazhit dhe ne vendosjen e Kosoves ne vemendjen e caktuar te te gjitha institucioneve relevante nderkombetare", vleresoi Isufi. Sipas sekretarit te perhershem ne Ministrine e Ekonomise, projekti si i tille do te zgjase per nje kohe te gjate. Ai shpjegon se vetem per vitin 2009, kompanise fitues do t'i jepen 3 milione euro. "Projekti do te zgjase me vite. Fillimisht qeveria per vitin 2009 dhe ne si Ministri e Ekonomise dhe Financave kemi ndare nje buxhet prej 3 milione euro. Paketa e projektit aktualisht, e cila eshte shpallur me tender, ka nje kosto diku prej 5.7 milione euro", tha ai. Edhe zedhenesi i qeverise, Memli Krasniqi, pohon se si shume shtete te ndryshme te botes edhe Kosova, si nje vend i dale nga lufta, ka nevoje per nje fushate te tille mediale nderkombetare. Ai madje thote se me nje fushate si ajo, mund te kete edhe investime ekonomike. "Kjo eshte nje prej arsyeve kryesore qe ta ndryshojme idene per Kosoven, ashtu sic kane bere edhe shume shtete te tjera, si Kroacia duke treguar se Kosova nuk eshte ai vend per te cilin ekzistojne paragjykime, por qe eshte nje vend i qendrueshem, nje vend i pavarur demokratik dhe nje vend qe ka perspektive per te gjithe. Po ashtu edhe nje vend i qendrueshem per investime te huaja", tha Krasniqi.

Ramosaj: Nuk kontestoj, por gjithcka te jete transparente

Eksperti per ceshtje ekonomike Berim Ramosaj, njekohesisht nenkryetar i partise opozitare Lidhja Demokratike e Dardanise, nuk e konteston shumen e parave per nje imazh te ri per Kosoven. Por, ai nuk pajtohet me mos transparencen e institucioneve kur behet fjala per projekte te medha. "Duke marre parasysh rendesen dhe te gjitha fenomenet, une nuk mund ta kontestoj si shume. Por, e kontestoj mungesen e transparences ne kete proces te dhenies, ne kuptimin e asaj qe cdo cent i taksave te qytetareve te Kosoves, eshte shume e udhes te behet transparent dhe ne harmoni me ligjin", tha Ramosaj. Qeveria e Kosoves edhe me heret ka deklaruar se synon te nise nje kompani reklamuese, per permiresimin e imazhit te Kosoves ne te gjitha aspektet ne bote.