Kosova përsëri nuk është e qetëNga Anna Di Lellio, “Guardian” Nën “pavarësinë e mbikëqyrur”, të realizuar në shkurt të vitit 2008, Kosova përsëri nuk është e qetë. Arkitektura institucionale, që mbikëqyr Republikën e Kosovës - një përfaqësues civil n

Nëse dëshironi të lexoni edicionin online të gazetës në PDF klikoni këtu.

Nën “pavarësinë e mbikëqyrur”, të realizuar në shkurt të vitit 2008, Kosova përsëri nuk është e qetë. Arkitektura institucionale, që mbikëqyr Republikën e Kosovës - një përfaqësues civil ndërkombëtar, misioni i Bashkimit Evropian për sundim të ligjit, EULEX, dhe misioni i OKB, UNMIK - gjithnjë dukej e ndjeshme. Tash ajo ka filluar të ketë çarje.

Për të parën herë prej marsit të vitit 2004, një pakënaqësi e thellë publike për praninë ndërkombëtare në Kosovë po del në sipërfaqe.

Para pesë vjetësh, trazirat e dhunshme e ridrejtuan frustrimin e përshkallëzuar të shqiptarëve me protektoratin e Kombeve të Bashkuara kundër pakicës serbe. Atëherë, si edhe tani, zyrtarët nuk i kuptuan shenjat e para të tensioneve.

Gjatë javës së fundit, lëvizja “Vetëvendosje” dëmtoi disa makina të EULEX. Shkaku për aksion ishte “protokolli për bashkëpunim policor” ndërmjet Serbisë e EULEX.

Por zyrtarët qeveritarë të Kosovës nuk e mbështetën atë, që ata besojnë se është shkelje e sovranitetit. Këtë nuk e ndihmoi edhe deklarata e ministrit serb për Kosovën, Goran Bogdanoviç, në një intervistë se protokolli tregon se Kosova është Serbi.

Është shumë shqetësuese, që një lëvizje si “Vetëvendosja”, që ishte e përkushtuar për taktika paqësore të protestave, tash e ka përqafuar dhunën. Më shqetësuese është se shumë shqiptarë, që i kishin dënuar aksionet e lëvizjes “Vetëvendosje”, ndajnë të njëjtën pakënaqësi të thellë për praninë ndërkombëtare në Kosovë. Ata e shohin atë si arbitrare dhe jodemokratike. Në Prishtinë, aktivistët e “Vetëvendosjes”, përgjegjës për vandalizëm, janë arrestuar menjëherë dhe me një paraqitje të pazakonshme të brutalitetit policor.

Saktësisht në të njëjtën kohë, në lagjen veriore, Kroi i Vitakut, policia e EULEX nuk ka bërë arrestime ndër turmën e serbëve të tubuar, që sulmuan ndërtuesit e shtëpive të shqiptarëve, të shkatërruara në vitin 1999. Por, jo vetëm kaq. Policia e bllokoi këtë hapësirë dhe e ndali rindërtimin.

Kjo sjellje është e papranueshme sipas të gjitha standardeve. Edhe nëse EULEX mbetet status-neutral, ai ende duhet ta mbrojë të drejtën e refugjatëve për t’u kthyer në shtëpi, siç qëndron në Rezolutën 1244 të Këshillit të Sigurimit të Kombeve të Bashkuara.

Por këtë nuk e bën për shqiptarët në veri të Kosovës, për shkak të mungesës së kontrollit në këtë rajon. Përfaqësuesi ndërkombëtar civil dhe UNMIK kanë autoritet vetëm ndaj pjesës jugore të Kosovës.