Kosova–Bullgaria e hapin turneun e pavarësisë

Përfaqësuesja e Kosovës do të përballet me atë të Bullgarisë të martën nga ora 16:30, në ndeshjen e parë të turneut ndërkombëtar për Ditën e pavarësisë së Republikës së Kosovës. Ndër të tjera do të marrin pjesë edhe Turqia e Maqedonia, me përbërjet e grupmoshës U20.

Ballafaqimi i dytë i së martës vë përballë Turqinë me Maqedoninë. Kjo ndeshje fillon në ora 19:00. Kurse të mërkurën në program është ndeshja për vendin e tretë, e cila zhvillohet në orën 11:30. Ndeshja për vendin e parë zhvillohet në orën 19:15.

Ndërkohë, Federata e Hendbollit e Kosovës (FHK) njofton se të martën (sot) në Kosovë do të qëndrojë edhe kryetari i Federatës së Hendbollit të Bullgarisë, Svetiomir Gocov dhe sekretari i përgjithshëm, Sabi Dojqinov, vizitë kjo e cila thellon edhe më shumë bashkëpunimin mes dy federatave. FHK informon se ka bërë të gjitha parapërgatitjet për këtë turne, me mbështetje të Departamentit për Sport të Kosovës.