Kosovarët në Gothia Cup
Tri skuadra kosovare në konkurrencën e meshkujve, Gjakova, Besa dhe Liria, dhe një në atë të fermave, Malisheva, do të jenë pjesëmarrëse në edicionin e 37-të të kupës së botës për të për të rinj, ‘Gothia Cup’, e cila do të mbahet në Goteborg të Suedisë.
Sipas organizatorëve të këtij turneu masiv, i cili do të fillojë më 18 dhe do të mbarojë më 24 korrik, do të marrin pjesë një rekord klubesh, 1570 nga 73 vende të ndryshme të botës. Klubi i Gjakovës, në kuadër të shkollës së futbollit, do të marrë pjesë në këtë kampionat botëror për të rinj për herë të tretë.
Ekipi i kaltër do të marrë pjesë me dy ekipe, U-15 dhe U-18. Vitin e kaluar, ata arritën sukses të madh duke u renditur në pozitën e katërt me ekipin U-15. Ata synojnë që edhe këtë vit të lënë përshtypje të mira në Suedi.
“Ekipi është duke u përgatitur mjaft mirë falë punës së palodhshme të trajnerëve Gëzim Daka, Lirim Dujaka e Faton Brahushi, të cilët u kanë dhënë lojtarëve disiplinë frytdhënëse”, deklaroi për Express përfaqësuesi i KF Gjakovës, Besmir Haxhikadrija.
Kapiteni i ekipit gjakovar, Veton Gola beson se ekipi i tij do t’i përsërit sukseset e vitit të kaluar. “Jam i lumtur që do të marrim pjesë edhe sivjet në këtë kampionat, ku do ta përfaqësojmë Kosovën me emblemën e shtetit. Do të mundohemi të tregojmë paraqitje të mira dhe të arrijmë rezultate të kënaqshme”, theksoi Gola.
Kontingjenti i gjakovarëve do të niset për në Suedi të martën mbrëma (sonte) dhe do të përbëhet nga rreth 40 persona.