Kreditë, procedim 5 gjyqtarëve
Eduard Halimi
Inspektimi, dalin me shkelje një gjyqtar i Tiranës, tre në Durrës dhe një në Mat.
Halimi: U shkaktuan bankave 2 miliardë lekë dëm.
Pesë gjyqtarë janë nën hetim nga Ministria e Drejtësisë për shkaktim dëmi financiar ndaj bankave. Një gjyqtar në Tiranë, një në Mat dhe tre në Durrës, sipas dikasterit të drejtësisë kanë pushuar ekzekutimin e kredive të dhëna nga bankat, duke shkaktuar një dëm financiar rreth 2 miliardë lekë. Lajmi është bërë i ditur nga Ministria e Drejtësisë, e cila tha dje se, në mbështetje të ligjit Për organizimin e pushtetit gjyqësor në Republikën e Shqipërisë, ka filluar procedimin disiplinor për 5 gjyqtarë të gjykatave të Shkallës së Parë për shkelje të rënda procedurale në çështjet civile. Një prej tyre ushtron veprimtarinë pranë Gjykatës së Rrethit Gjyqësor Tiranë, 3 gjyqtarë pranë Gjykatës së Rrethit Gjyqësor Durrës dhe 1 gjyqtar pranë Gjykatës së Rrethit Gjyqësor Mat, tha zyra për shtypin në Ministrinë e Drejtësisë. Procedimet ndaj gjyqtarëve janë bazuar në rezultatet e dala prej dy inspektimeve të kryera nga Drejtoria e Përgjithshme e Çështjeve të Drejtësisë. Inspektimet janë zhvilluar për verifikimin e çështjeve gjyqësore me të paditur apo person të tretë bankat e nivelit të dytë, ku gjyqtarët e proceduar kanë pezulluar ekzekutimin e kredive të këqija, me pasojë dëmtimin e rëndë të sistemit bankar. Shkeljet e ligjit të kryera nga gjyqtarët kanë favorizuar debitorët e bankave të nivelit të dytë, tha Ministria e Drejtësisë. Sipas saj, me këto procedime ndaj gjyqtarëve abuzues realizohet mbrojtja e dinjitetit e të drejtave dhe lirive themelore të njeriut, mbrojtja e interesit publik, si dhe e interesave të ligjshëm të personave fizikë dhe juridikë.
KREDITË E KËQIJA
Çështjet për të cilat akuzohen pesë gjyqtarët e proceduar nga Ministria, kanë të bëjnë me kredi të dhëna nga bankat të cilat janë klasifikuar si kredi të këqija për shkak të mospagimit të kësteve në afatin e caktuar. Në këto raste, me kalimin e një afati, banka bën padi në Gjykatë dhe kërkon nxjerrjen e urdhrit të ekzekutimit me qëllim sekuestrimin e garancisë së lënë nga kredimarrësit. Ky operacion ligjor i bankës tenton ruajtjen e parave të dhëna, ndërsa gjykatat në përgjithësi vendosin pro dhe ia kalojnë urdhrin Përmbarimit për ekzekutim. Këtu ndodh edhe pjesa subjektive e çështjes, pasi Përmbarimi në shumicën e rasteve i ekzekuton urdhrat e gjykatës, por ka raste që urdhri nuk ekzekutohet. Ky mosekzekutim për arsye të ndryshme zgjat në kohë aq sa zbatimi i vendimit të gjykatës del nga afati ose nga kriteret ligjore dhe, për rrjedhojë, gjykata mund të vendosë edhe pushimin e ekzekutimit të kredisë. Në këtë rast ajo që humb është banka, pasi ka dhënë paratë e veta kredi dhe përfituesi nuk kthen shumën e marrë, por edhe bankës nuk i mbetet asnjë mundësi për kthimin e parave. Kështu ka ndodhur me pesë gjyqtarët, që në total u kanë shkaktuar bankave humbje në rreth 2 miliardë lekë me vendimet e tyre.
DOSJET TE GJYQTARËT
Pas përfundimit të procedurës së kontrollit për vendimet e dhëna nga gjykatat, Ministria e Drejtësisë ka njoftuar pesë gjyqtarët e çështjeve civile. Atyre mësohet se u janë dhënë në dorëzim materialet e Ministrisë së Drejtësisë së bashku me dokumentet dhe provat ku bazohen akuzat e ngritura. Gjyqtarët pritet të japin argumentet e tyre në lidhje me vendimet që kanë dhënë dhe më pas procedura vazhdon në KLD, ku votohet për masën që do të jepet ndaj gjyqtarëve.
TRAZHGIM SOKOLAJ