Krujë, lumi Ishëm përmbyt 100 ha tokë

KRUJE – Rikthehen reshjet, por edhe përmbytjet në rrethin e Krujës. Lumi Ishëm mësohet se ka përmbytur mbi 100 hektarë tokë në fshatrat Mërqin, Bilaj, Bunq, Thumanë, Gramës e Derven. Lumi ka dalë nga shtrati pranë urës së trenit në Mërqin, duke rrethuar dhe 15 shtëpi banimi. Rikthimi i përmbytjeve të këtij lumi vjen pas pasojave ende të parikuperuara të vitit të shkuar. Për shkak të mosfunksionimit të kanaleve kulluese, ujërat e tij depërtojnë ku të mundin, duke mbuluar sipërfaqe të konsiderueshme toke dhe duke rrezikuar banesat e zonave ku ai kalon. Lumi Ishëm është shqetësim jo vetëm për përmbytjet dhe përhapjen e ujërave të tij në fshatrat përgjatë shtratit, por dhe për ndotjen masive që shkakton. Bashkë me rrjedhën e ujit, në të notojnë mbeturina të shumta urbane dhe industriale. Vetëm pak ditë më parë, këto mbeturina pushtuan të gjithë plazhin e Durrësit, pasi u transportuan aty nga rrymat detare. Sipas Kastriot Palukës, një banor i zonës, kjo situatë përsëritet vazhdimisht. Është turp që me kaq reshje të përmbyten qindra hektarë tokë dhe shtëpi banimi. Askush nuk vjen për të na parë.                  r.n