Kryeministri Berisha priti në një takim përfaqësuesit e kompanisë JTP e specializuar në përpunimin e mbetjeve urbane

Kryeministri Berisha  priti përfaqësuesit  e kompanisë  JTP  (Joint  Technology  Protocol), të kryesuar nga drejtori i kësaj kompanie Nicholas  Shipley, drejtori i menaxhimit  Julian Parry si dhe përfaqësuesja e ambasadës Angleze në Tiranë  Elisabeth  Evans.

Zoti  Nicholas  Shipley,  i prezantoi kryeministrit projekt-propozimin  e kompanisë së tij, për të realizuar një investim në fushën e përpunimit të mbetjeve urbane në Shqipëri dhe të riciklimit të tyre.

Zoti Shipley e informoi  kryeministrin Berisha se kompania e tij, angleze është e tërhequr nga Shqipëria për të mundësuar një investim në fushën e menaxhimit të mbetjeve urbane, sepse Shqipëria për ta përfaqëson një vend  ftues për  investimet e huaja, shumë të sigurtë dhe impresionues  për zhvillimet e bëra.

Teknologjia në bazë të projektit të tyre, theksoi  zoti Shipley, është një teknologji e re sipas objektivave të Kombeve të Bashkuara, synon në reduktimin sa më të madh të mbetjeve pas përpunimit të tyre deri në zero. Sipas këtij projekti, mbledhja dhe përpunimi  i  mbetjeve urbane shoqërohet  me riciklimin e tyre prodhimin e energjisë dhe eliminimin  e Landfilleve.

Ambiciet e kompanisë janë të mëdha, krahas ndërtimit të impiantit  të përpunimit të mbetjeve urbane në projektet e saj përfshihen  dhe ndërtimi  i një  impianti për prodhimin e autoklavave moderne të një gjenerate të re, ku punësohen inxhinierë elektrikë, për cilësinë e të cilëve tha  zoti Shipley,  Shqipëria përmendet. Për të trajnuar stafin parashikohet dhe një strukturë trajnimi e tyre. Zoti  Shipley, tha se në Shqipëri kanë gjetur partner  vendas  të përgatitur për të ndërmarrë sëbashku projektin.

Kryeministri  i Berisha  pasi i falenderoi  përfaqësuesit e kompanisë për interesin e tyre,  për investimin në Shqipëri dhe përzgjedhjen e saj si vend të zbatimit të projektit të tyre, i garantoi që strukturat e qeverisë së tij do të mbështesin pa  rezerva vlerësimin dhe implementimin  e tij konform  ligjeve në fuqi.  Për qeverinë Berisha problem  i menaxhimit të mbetjeve konform  standardeve ambientaliste  europianë është një problem parësor, që ecën në linjë dhe me projektet e mëdha të zhvillimit të turizmit.

Kryeministri gjithashtu theksoi se e sheh shumë të frytshëm  bashkëpunimin  e biznesit  dhe komunitetit vendas me këtë kompani të huaj.