Kryeministri Berisha: Buxheti 2009, me rreth 5 miliard dollarë, është buxheti më i madh në historinë e vendit

-          “Ky buxhet, në masë të madhe, është buxheti i infrastrukturës.”

Nën drejtimin e Kryeministrit Berisha, u zhvillua sot një mbledhje e përbashkët e qeverisë dhe Komitetit të Planifikimit Strategjik, ku u diskutua mbi projektbuxhetin e shtetit për vitin 2009.

Duke prezantuar buxhetin 2009, Kryeministri Berisha tha se buxheti, që kap shifrën e rreth 5 miliard dollarëve, përbën buxhetin më të  madh në historinë e vendit.

“Në buxhetin 2009, - u shpreh Kryeministri - janë ruajtur të gjitha linjat programore të qeverisë. Ai garanton stabilitetin makroekonomik të vendit dhe rritjen ekonomike që, 6 mujorin e parë të këtij viti, ishte dyshifrore. Natyrisht, rritja vjetore do të dalë përfundimtare në muajt e parë  të vitit që vjen.”

Kryeministri Berisha, duke u ndal në drejtimet kryesore të buxhetit për vitin e ardhshëm, tha se ai përqendrohet në investimet e mëdha publike, si në akset e rëndësishme rrugore:

-          Përfundimin e autostradës Durrës-Morinë;

-          Përfundimin e autostradës Bllatë-Bulqizë;

-          Përfundimin e autostradës Korçë-Qafë Plloçë;

-          Përfundimin e punimeve në rrugën Vlorë-Sarandë’

Buxheti përqendrohet gjithashtu në:

-          Shndërrimin në 4 korsi të autostradës Fushë Krujë-Milot;

-          Në fillimin e punimeve për ndërtimin e  segmentit të rrugës së Arbrit, Bulqizë-Klos. Sapo të mbarojë projekti, fillon ndërtimi Tiranë, nga Shkalla e Tujanit, drejt Klosit;

-          Në projektimin dhe fillimin sa më të shpejtë të autostradës Plloçë-Qukës që, sipas të dhënave paraprake, është fizibël dhe shumë e nevojshme;

-          Në ndërtimin, në një pjesë të mirë të saj, në një aks të ri të rrugës Krumë-Kukës, e cila shkurton distancën midis këtyre dy rretheve;

-          Në fillimin e punimeve të aksit Kardhiq-Delvinë, nga ana e Delvinës;

-          Në përfundimin e rrugës së Prespës, që lidh aksin kombëtar me liqenin e Prespës;

-          Në segmentin e Valbonës, të Qafë Prushit;

-          Avancimin e punimeve të rrugës Kukës drejt Kalasë së Dodës, të Peshkopisë në drejtim të Kalasë së Dodës; të rrugës Stërblevë në drejtim të Orenjës dhe Peshkopisë.

Buxheti përqendrohet edhe në ndërtimin e një seri rrugësh që zbresin drejt detit, nga Bërdica deri në Ksamil, si dhe në segmente të tjera të rëndësishme.

-          Sapo të përfundojë projekti, rruga Bogë-Theth;

-          Sapo të përfundojë projekti, rruga Kukës-Shishtavec;

-          Unazën që lidh Dardhën dhe të gjitha zonat e bukura malore të Korçës;

-          Rrugën që të çon drejt majës së Çajupit dhe një seri rrugësh të tjera.

Buxheti përqendrohet në ndërtimin dhe asfaltimin e qindra e qindra kilometrave rurale.

Kryeministri theksoi se buxheti 2009, në masën e madhe të tij, mbetet buxhet i infrastrukturës, ku, përveç akseve të rëndësishme rrugore, përqendrohet edhe në ujësjellës, impiantet e përpunimit të ujërave të zeza, landfilld-et që janë në ndërtim nga Shkodra, në Sarandë, Korçë dhe të gjitha qarqet e vendit.