Kryeministri Berisha: Marrëveshjet e nënshkruara krijojnë një infrastrukturë solide për bashkëpunimin dypalësh në të gjitha fushat

Kryeministri Berisha organizoi sot një darkë, në Pallatin e Brigadave, për nder të Kryeministrit të Shtetit të Kuvajtit, Sheik Naser AL Mohammad Al Ahmad Al Jaber Al Sabah, vizita e parë e një Kryeministri të Kuvajtit në Shqipëri.

Gjatë fjalës së tij përshëndetëse, Kryeministri Berisha shprehu mirënjohjen për mbështetjen dhe ndihmën e dhënë Shqipërisë gjatë gjithë këtyre viteve.

“Ne i jemi mirënjohës vendit tuaj për mbështetjen, ndihmën dhe solidaritetin ndaj vendit dhe kombit tim gjatë gjithë këtyre viteve.”

Kryeministri Berisha theksoi se kjo vizitë, vizita e parë e një Kryeministri të Shtetit të Kuvajtit në Shqipëri, shënon një zhvillim thelbësor në marrëdhëniet miqësore midis dy vendeve.

“Ne gjetëm ndjenja miqësore dhe mbështetjen e madhe dhe jam thellësisht i bindur se kjo vizitë shënon një zhvillim të rëndësishëm në marrëdhëniet tona,” u shpreh Kryeministri.

Duke i vlerësuar gjithashtu marrëveshjet e nënshkruara sot një zhvillim të rëndësishëm në këto marrëdhënie, Kryeministri theksoi se ato krijojnë një infrastrukturë ligjore solide për bashkëpunimin dypalësh në të gjitha fushat.