Kryeministri Berisha: Sistemi i vlerave, i demokracisë, i normave dhe i të drejtave, është kryevepra jonë 20 vjeçare. Liria është dhe do të mbetet pasioni i shpirtit tonë

Kryeministri Berisha iu bashkua sot pasdite koncertit të madh festiv, organizuar në sheshin “Demokracia”, në qytetin Studenti, me rastin e 20 shkurtit, ditës së rrëzimit të bustit të diktatorit Enver Hoxha, 22 vjet më parë, në Tiranë.

Ky koncert mblodhi në këtë shesh qindra e mijëra të rinj e të reja, studentë e qytetarë nga Tirana e mbarë Shqipëria, ish studentë pjesëmarrës në grevën më masive të urisë 22 vjet më parë, për të përkujtuar së bashku këtë ditë të shënuar, simbol të përmbysjes së diktaturës hoxhiste, por edhe për të nderuar ditën kombëtare të kujtesës së martirëve dhe viktimave të sistemit komunist.

Në shenjë simbolike, disa të rinj e të reja shembën “murin bllokues të integrimit”, të improvizuar prej tyre në skenën e këtij koncerti, mur i ngritur nga mosvotimi i 3 ligjeve të rëndësishme në parlament, që bllokojnë marrjen e statusit të vendit kandidat për në BE.    

Në përshëndetjen e tij, Kryeministri Berisha e vlerësoi 20 shkurtin si ditën e guximit, e heroizmit, e lirive, e të drejtave dhe dinjitetit të shqiptarëve, duke shprehur nderimet më të mëdha për kontributin e studentëve të lirisë, e qindra e mijëra qytetarëve të Tiranës e mbarë Shqipërisë, që përmbysën në 20 shkurt diktaturën më të egër komuniste në Evropë, shtatoren e Enver Hoxhës, “Hitlerit” të shqiptarëve të pas Luftës së Dytë Botërore.

Gjithashtu, Kryeministri Berisha ftoi gjithë të pranishmit në këtë shesh që të mbanin një minutë heshtje, në nderim të të gjithë atyre martirëve të lirisë që, në diktaturë, flijuan jetën dhe rininë për dinjitetin dhe liritë që gëzon çdo shqiptar sot.

Kryeministri theksoi se sot, pas 22 vitesh, çdo qytetar i këtij vendi ka shumë arsye të ndihet krenar më shumë se kurrë për zhvillimin e kombit të tij, sepse, nga vendi më i izoluar i planetit, nga vendi i tretë më i varfër i botës, vendi i rrethuar me tela me gjemba, vendi i eksodeve biblike, sot jemi vendi anëtar i NATO-s dhe qytetarë të cilët lëvizim të lirë në mbarë Evropën. “Jemi vendi i zgjedhjeve të lira, i shtetit ligjor, i demokracisë që funksionon. Sistemi i vlerave, sistemi i demokracisë, sistemi i normave dhe i të drejtave, është kryevepra jonë 20 vjeçare. Liria është dhe do të mbetet pasioni i shpirtit tonë”, nënvizoi Kryeministri Berisha.

Në përshëndetjen e tij Kryeministri Berisha u shpreh:

“Të dashur qytetarë e qytetare të Tiranës e të mbarë Shqipërisë,

Të rinj e  të reja, studentë, vëllezër e motra,

Zonja e zotërinj!

Jemi mbledhur sot në këtë shesh të historisë sonë të lirisë që të festojmë së bashku ditën më të shënuar për liritë dhe dinjitetin e qytetarëve shqiptarë, 20 shkurtin, ditën e përmbysjes së diktaturës hoxhiste, shtatores së diktatorit Enver Hoxha dhe bronxeve të gjalla të bllokmenëve të saj. Por sot, ne nderojmë së bashku ditën kombëtare të kujtesës së martirëve dhe viktimave të sistemit barbar komunist.

Gëzuar 20 shkurtin, ditën e guximit, e heroizmit, e lirive, e të drejtave dhe dinjitetit tonë qytetar. Gëzuar ditën e kujtesës kombëtare, për gratë e burrat, djemtë e vajzat, që u martirizuan për së gjalli për fjalën e lirë, për besimin te Zoti, besimin te Shqipëria.

Qytetarë të Tiranës,

Si sot 22 vjet më parë, ne bëmë që liritë dhe dinjiteti ynë njerëzor, besimi dhe shpresa mbi të ardhmen që meritonim, të ngadhënjehej  mbi shtypjen e egër, frikën, poshtërimin, pesimizmin, dëshpërimin në të cilin na kishte zhytur një regjim barbar.

22 vjet më parë, në këtë shesh, studentët liberator morën vendimin për sakrificë sublime, ndërmorën grevën epike të urisë, grevën më masive të lirisë që kishte parë Evropa dhe bota, për heqjen e emrit të diktatorit Enver Hoxha nga universiteti në të cilin ata studionin. Këta vajza e djem, me një vendosmëri të madhe, me një guxim të jashtëzakonshëm, të vendosur për sakrificën më të madhe, u ngujuan në ndërtesën pak më poshtë prej këtej, për nderin, dinjitetin, lirinë e mbarë shqiptarëve. Njëlloj si ditët e dhjetorit të 90-ës, qytetarët e Tiranës, qytetarët e mbarë Shqipërisë, do të vërshonin si uragan drejt grevës së urisë, në një mbështetje të fuqishme. 20 shkurti shënon gjithashtu ditën në të cilën Partia Demokratike e Shqipërisë, partia e parë opozitare e vendit, do të organizonte, do të realizonte, një nga fitoret më të mëdha, më kulmore në tërë historinë e saj, fitoren e cila, në 3 muaj jetë, do ta bënte atë forcën politike më të fuqishme antikomuniste në Evropë. Nder përjetë studentëve të lirisë, për kontributin e tyre, nder përjetë qindra e mijëra qytetarëve të Tiranës e mbarë Shqipërisë që përmbysën në 20 shkurt diktaturën më të egër komuniste në Evropë, shtatoren e Enver Hoxhës, “Hitlerit” të shqiptarëve të pas Luftës së Dytë Botërore.

 Të dashur qytetarë të Tiranës e mbarë Shqipërisë!

 Në 20 shkurt ne nderojmë ditën kombëtare të kujtesës së martirëve dhe viktimave të sistemit totalitar. Në Shqipërinë e Enver Hoxhës, me barbarinë e luftës së klasave, u morën mijëra e mijëra jetë të pafajshme shqiptarësh. Qindra mijëvjeçarë vitesh lirie iu vodhën të rinjve, burrave e grave të këtij vendi, të cilët rezistuan me trimëri të veçantë, me heroizëm të pamposhtur për liritë e të drejtat që ne gëzojmë sot. Ata besonin tek fjala e lirë, tek Krishti, te Muhamedi, dhe Zoti, besonin te prona, te dheu i tyre, te lëvizja  e lirë. Le të përulemi me nderim të madh para të gjithë atyre që flijuan jetën dhe rininë për dinjitetin dhe liritë që gëzojmë ne sot.

Ju ftoj të nderojmë, me një minutë heshtje, sakrificën e tyre për liri e dinjitet njerëzor.

Nder përjetë Martirëve të Lirisë.

Të dashur qytetarë e qytetare të Tiranës,

 Vëllezër e motra,

 Zonja e zotërinj!

Dy dekada që kemi kaluar, nga 20 shkurti i vitit ‘91 e deri më sot, kanë qenë jo të lehta për ne. Përkundrazi, ne jemi përballur me vështirësi të mëdha, vuajtje, sakrifica, mangësi, gabime, vështirësi jo të vogla. Diktatura hoxhiste shkatërroi Shqipërinë, shkatërroi qenien e shqiptarit më shumë se sa e kishte shkatërruar atë çdo luftë, çdo pushtim, çdo epidemi a fatkeqësi natyre, në tërë historinë tonë dhe më shumë se sa në çdo vend tjetër të planetit. Ndaj dhe sot, thirrja ime për të gjithë shqiptarët, thirrja ime për të gjithë ata fatlumë e fatlume qe nuk jetuan asnjë ditë në diktaturë, është; le të mos harrojmë kurrë sakrificën e martirëve të lirisë, le të urojmë që ajo vuajtje, ajo sakrificë të na bëhet dritë në rrugën tonë drejt të ardhmes që meritojmë.

Sot ne, qytetarët e këtij vendi, në këtë shesh dhe kudo që ndodhemi, kemi një mijë e një arsye të ndihemi krenarë më shumë se kurrë në jetën tonë, krenarë sepse asnjë komb tjetër, në rrugën e lirisë, nuk ka realizuar ato që kemi realizuar ne në 2 dekada. Jemi krenarë se sot, nga vendi më i izoluar i planetit, nga vendi i tretë më i varfër i botës, nga vendi i rrethuar me tela me gjemba, nga vendi i eksodeve biblike, jemi vendi anëtar i NATO-s, jemi vendi qytetarët e të cilit lëvizin të lirë në mbarë Evropën, jemi vendi që ecim të sigurt drejt prosperitetit që meritojmë. Jemi vendi i zgjedhjeve të lira, i shtetit ligjor, i demokracisë që funksionon.

Sistemi i vlerave, sistemi i demokracisë, sistemi i normave dhe i të drejtave, është kryevepra jonë 20 vjeçare. Liria është dhe do të mbetet pasioni i shpirtit tonë.

 Qytetarë të Tiranës e mbarë Shqipërisë,

Studentë e studente,  të rinj e të reja!

Sot, pas 22 vitesh, të përmbysjes së diktaturës hoxhiste, bijtë e etërve hoxhistë, pasi pushtuan kreun e PS-së, guxuan të ndërmarrin përmbysjen me dhunë të pushtetit tuaj, të dalë nga vota e lirë. Ata gabuan dhe ne u themi edhe njëherë se, pushtet me dhunë në këtë tokë nuk do të merrni kurrë. Liria dhe mbrojtja e vlerave të saj janë pasioni ynë, janë forca e pathyeshme e Kushtetutës, e ligjeve, e institucioneve të Shqipërisë. Sot, pas 22 vitesh, ata  me një verbëri të plotë politike, përdorën pushtetin që u kanë besuar zgjedhësit shqiptarë për t’u ngritur atyre, në rrugën e integrimit, murin e turpit, murin e bllokimit. Por përsëri ata gabojnë. Kësaj radhe gabojnë për të mos mundur të gabojnë kurrë më. Kësaj radhe, me votën tonë, ne do të firmosim fundin e tyre, fundin e merituar. Shqiptarët, në 23 qershor, do të votojnë për integrimin e tyre në Evropë, për liritë e të drejtat e tyre, do të votojnë për Shqipërinë e zhvilluar, për Shqipërinë evropiane.

Ne jemi ndryshimi, ne do të fitojmë. Përpara, përpara, përpara!

Zoti e bekoftë Shqipërinë!

Zoti i bekoftë shqiptarët, demokracinë e tyre!

Gëzuar!”