Kryeministri Berisha pret drejtues të shkollës “Qemal Stafa”

Kryeministri Berisha prit sot në një takim drejtorin e shkollës “Qemal Stafa”, z. Astrit Boriçi dhe mësuesen e kësaj shkolle, znj. Entela Kasi. Ata i paraqitën Kryeministrit trofeun “Harku i Artë i Evropës”, i punuar në ar, në formën e Harkut të Triumfit, trofe që i është dhënë shkollës “Qemal Stafa” nga organizata ndërkombëtare BID Evropë për përmbushjen e kritereve të cilësisë dhe për rezultatet e saj të mira gjatë dhjetë viteve të fundit.

Kryeministri Berisha i përshëndeti përzemërsisht përfaqësuesit e shkollës “Qemal Stafa”, duke vlerësuar cilësinë e kësaj shkolle, përkushtimin e bërë dhe ndikimin pozitiv kur ky vlerësim ndërkombëtar përputhet plotësisht edhe me vlerësimin kombëtar për shkollën “Qemal Stafa”. Ky është fryti i punës së stafit dhe nxënësve të kësaj shkolle. Ai përbën një element shumë të rëndësishëm, një ftesë për të ndezur garën midis të rinjve dhe për të arritur rezultate gjithnjë e më të mira.

Është emocionuese që gjuha shqipe është e shkruar në flori, - tha Kryeministri Berisha, - dhe i inkurajoi përfaqësuesit e kësaj shkolle që të vazhdojnë edhe më tej punën e tyre, pasi midis të gjitha garave, ajo e dijes është më e rëndësishmja, më e vështira, por që gjithnjë jep rezultatin e dëshiruar.

02/05/2013