Kryeministri Berisha shpreh solidaritetin ndaj kombit japonez dhe qeverisë japoneze, në një moment tragjedie të rëndë natyrore që goditi Japoninë

Kryeministri Berisha, në emër të qeverisë shqiptare shprehu sot, ndjenjat e solidaritetit, ndaj kombit japonez dhe qeverisë japoneze, në një moment tragjedie të rëndë natyrore, e cila u shkaktua nga tsunami dhe tërmeti i fortë që goditi këtë vend.

Gjatë mbledhjes së Komitetit të zhvillimit të Rajoneve, kryeministri Berisha u shpreh me këto fjalë për  fatkeqësinë natyrore që ndodhi në Japoni:

“Le të shprehim ndjenjat më të thella të solidaritetit, të simpatisë, me kombin e madh japonez, perandorit, madhërisë së tij Akihito, kryeministrit Kan, në një moment tragjedie të madhe natyrore. Ky komb përballet sot, me një nga fatkeqësitë më të mëdha  natyrore, në historinë  e Japonisë.

Tsunami me dallgë me një lartësi prej 10 metrash dhe një tërmet  prej 8.9 shkallësh ka goditur Japoninë  me rezonim të fuqishëm në të gjithë brigjet e Pacifikut, duke shkaktuar shkatërrime të paimagjinueshme dhe humbje jetësh akoma të pallogaritshme.

Le të shprehim ne, solidaritetin më të madh, me qeverinë e Japonisë. Le të lutemi që të jetë sa më i vogël numri i papërcaktuar i viktimave, pasi dallga 10 metërshe e lartë e ujit të oqeanit Pacific ka rrafshuar gjithçka që ka gjetur përpara, po kështu edhe tërmeti. Tsunami ka goditur prefekturën  e Miagit dhe qytetin e  Cendai , kurse tërmeti është në afërsi të Tokios.”