Kryeministri Berisha takon ambasadorin hungarez në Shqipëri, zotin Sandor Molnari

Kryeministri Berisha zhvilloi sot një takim me ambasadorin hungarez, zotin Sandor Molnari me rastin e marrjes nga Hungaria të Presidencës së radhës së BE-së.

Pasi i uroi mirëseardhjen,  kryeministri  Berisha shprehu bindjen e thelle se Presidenca hungareze e BE-së do të jetë e suksesshme në realizmin e detyrave që i ka vënë vetes, si për promovimin e prioriteteve të rëndësishme të axhendës së BE-së, por edhe për tejkalimin e sfidave, në veçanti për kapërcimin  e vështirësive dhe pasojave të krizës ekonomiko -financiare.

Gjatë këtij takimi, ambasadori hungarez, i  rikonfirmoi kryeministrit Berisha mbështetjen e plotë të qeverisë dhe të presidencës hungareze për përpjekjet  e Shqipërisë për integrimin në BE.

Nga ana e tij, kryeministri Berisha e falënderoi për këtë mbështetje dhe vlerësoi se integrimi i vendit në BE është projekti madhor kombëtar dhe se qeveria shqiptare është plotësisht e angazhuar dhe e vendosur të ndërmarrë çdo reforme dhe çdo masë  dhe po punon intensivisht për realizmin sa më shpejt të kësaj ëndrre, duke  e parë këtë proces të bazuar tërësisht në performancën dhe meritën. Kryeministri theksoi gjithashtu se raporti i Komisionit Evropian po kthehet në plan veprimi dhe se qeveria është e angazhuar që të bëj gjithshka te mundur për plotësimin e detyrave të lëna në këtë raport.

Më tej,  ambasadori Molnari e njohu kryeministrin me  prioritetet e presidencës së radhës të BE,  të cilat ndër të tjera përfshinin; nxitjen e rritjes ekonomike; punësimin dhe përfshirjen sociale;  forcimin e politikave koordinuese ekonomike dhe fuqizimin e institucioneve financiare ne nivel evropian; promovimin  e politikave të përbashkëta në fusha si bujqësia,  energjia, kohezioni etj; sjelljen e Evropës më pranë qytetarit dhe promovimin e politikave në fushën e kulturës.

Ambasadori  Molnari u shpreh se Hungaria, bazuar mbi axhenden e Selanikut, mbështet fuqishëm integrimin  e Shqipërisë dhe të vendeve të  Ballkanit Perëndimor në BE dhe se do të punoje ngushtësisht me qeveritë e këtyre vendeve, për hapat  e mëtejshëm në këtë drejtim.

Kryeministri  e falënderoi dhe njëherë për vëmendjen e veçante  ndaj axhendes së integrimit, duke shprehur bindjen se Hungaria si një vend mik dhe përkrahës do të sjell një kontribut  dhe një dimension të  ri  në proceset e integrimit të vendeve të Ballkanit perëndimor në BE.