Kryeministri Berisha zhvillon homazhe në nderim të kryetarit të bashkisë së Sukthit, Yrjan Hasani

Kryeministri Berisha zhvilloi sot homazhe në nderim të kryetarit të bashkisë së Sukthit, Yrjan Hasani, i cili u nda nga jeta një ditë më parë, në moshën 43 vjeçare.

Duke shprehur ngushëllime për familjarët, miqtë dhe të afërmit e të ndjerit Yrjan Hasani, Kryeministri Berisha u shpreh: “Erdha të shpreh nderimin tim më të thellë, dhimbjen, pikëllimin, për ndarjen shumë të parakohshme nga jeta të mikut, veprimtarit të shquar e të vendosur të Partisë Demokratike, qeveritarit vendor të talentuar, Qytetarit të Parë të Sukthit, kryetarit të bashkisë Yrjan Hasani, i cili punoi me aq përkushtim dhe dashuri për projektin e ndërtimit të kësaj bashkie, transformimit të saj dhe të shndërrimit në një vend më të mirë për të gjithë qytetarët.

Kjo është humbje e madhe, së pari për familjen, por është një humbje e madhe edhe për të gjithë komunitetin e bashkisë së Sukthit, Durrësin dhe mbarë Shqipërinë.

Duke i shprehur ngushëllimet e mia më të sinqerta familjes, miqve, të afërmve, lutem së bashku me ta që shpirti i njeriut të tyre më të dashur e të mrekullueshëm, se Yrjani ishte një njeri i mrekullueshëm dhe e donin të gjithë, të gjejë paqen e merituar”.

Më pas, Kryeministri Berisha iu përgjigj interesit të medias:

-       Pyetje: Zoti Berisha, në shembullin e zotit Hasani a keni ndonjë thirrje për t’i bërë klasës politike në këtë prag fushate?

Kryeministri Berisha: Mendoj se e tërë jeta e tij ishte një përkushtim ndaj këtyre qytetarëve, problemeve, halleve dhe derteve të tyre, projekteve të shumta për të ngritur këtu një infrastrukturë moderne të merituar. Jam i bindur se pasardhësi i tij do të vazhdojë me përkushtim të madh këtë rrugë.

Sikundër, ashtu siç kam deklaruar, e tërë kjo periudhë do të jetë për ne periudhë përkushtimi total ndaj problematikës së qytetarëve dhe të komuniteteve. Ne qëndrojmë dhe do qëndrojmë njëlloj si miku ynë, që u nda nga ne, me të gjithë forcën dhe potencialin për të përmbushur interesat më të mira të qytetarëve dhe komuniteteve ku ata jetojnë.