Kryeministri Fatos Nano zhvilloi sot, gjatë vizitës së tij në Itali, një takim me Ministrin italian të Mbrojtjes, Antonio Martino. Kryeministri Nano u shpreh se Italia është partneri ynë k

Kryeministri Fatos Nano zhvilloi sot, gjatë vizitës së tij në Itali, një takim me Ministrin italian të Mbrojtjes, Antonio Martino.

Kryeministri Nano u shpreh se Italia është partneri ynë kryesor, dhe me këtë rast ka vlerësuar ndihmën e dhënë nga Forcat e Armatosura Italiane për mbështetjen e njësive prioritare të Forcave tona të Armatosura, ndihmë e cila ka ndikuar në rritjen e kapaciteteve operacionale.

Gjithashtu, Kryeministri Nano ka vlerësuar ndihmën e dhënë nga pala italiane në ristrukturimin e Forcave tona të Armatosura, hartimin e dokumentave kryesore dhe legjislacionit në fushën e mbrojtjes, mbështetjen e strukturave të reja të Forcave të Armatosura, pajisjen logjistike, si dhe zhvillimin e trajnimeve dhe të stërvitjeve të përbashkëta.

Bashkëbiseduesit ndanë të njëtën pikëpamje për domosdoshmërinë e hartimit të një Plani Afatgjatë Bashkëpunimi, i cili do të forconte më tej bashkëpunimin në fushën e mbrojtjes.

Më tej ata janë ndalur në disa çështje konkrete të bashkëpunimit si asistenca për Rojen tonë Bregdetare nga ana e palës italiane, ngritja në një nivel me të lartë e bashkëpunimit dhe asistencës në përmirësimin e inftrastrukturës së Ushtrisë sonë, ndihmesa për ngritjen e Universitetit të Mbrojtjes, vazhdimi i projektit të helikopterëve, projektit të ndërtimit të aeroportit të Pish-Poros, bashkëpunimi në kuadër të SEEBRIG.

Në takim u diskutua edhe mbi mbështetje logjistike për një repart të Spitalit Ushtarak duke u përqëndruar veçanërisht ne krijimin e infrastrukturës së nevojshme te Telemedicinës si dhe për idenë e zbatimit të një projekti të ri "Ç'ndotja bregdetare".

Ndërkohë, Kryeministri Nano është ndalur edhe në interesin që paraqet për palën shqiptare bashkëpunimi në fushën e arsimimit ushtarak, nëpërmjet të drejtave të studimit në akademitë dhe institutet ushtarake italiane.

Nga ana e tij Ministri italian i Mbrojtjes Martino vlerësoi progresin e bërë nga Ushtria shqiptare si dhe garatoi mbështetjen e vazhdueshme të Italisë në hapat që po ndërrmerr Shqipëria për anëtarësimin e saj në NATO. Gjithashtu z. Martino shprehu vlerësimin edhe për rolin moderator që luan Qeveria shqiptare në rajon në funksion të forcimit të sigurisë dhe stabilitetit të tij.