Kryeministri Sali Berisha: Lulzim Basha, qytetari model për Kryebashkiak të Tiranës

“Lulëzim Basha, ka për të qenë kryetari i ardhshëm i Bashkisë së Tiranës”. Kështu deklaroi dje kryeministri Sali Berisha gjatë fjalimit të tij në mitingun e çeljes së fushatës elektorale për bashkinë e Tiranës. Kreu i qeverisë dhe njëherazi lideri i koalicionit “Aleanca për Qytetarin”, foli me superlativa për kandidatin e mazhorancës, Lulzim Basha, duke u shprehur i sigurt për fitoren e tij në zgjedhjet vendore të 8 majit. Berisha tha se Basha është një prej personaliteteve më të shquara të sukseseve të Partisë Demokratike gjatë këtyre viteve.  “I dashur zoti Lulzim Basha, kryetari i ardhshëm i Bashkisë së Tiranës, e nderuar zonja Basha, e dashur Dafina, ylli i vërtetë  i këtij takimi. Jemi mbledhur sot, për t’i shprehur mbështetjen  tonë, kandidatit të Partisë Demokratike, të “Aleancës për Qytetarin”, njërit prej personaliteteve më të shquara të sukseseve të Partisë Demokratike. Njërit prej qytetarëve më të shquar të kryeqytetit, intelektualit të talentuar zotit Lulzim Basha. Sot, ne së bashku jemi këtu, për të mbështetur qytetarin e parë të ardhshëm të Tiranës, birin e këtij kryeqyteti, që 20 vjet më parë, në maturën e tij, me qindra e mijëra maturantë të Tiranës, do të përballej në rrugët dhe sheshet e kryeqytetit me diktaturën më të egër dhe do ta përmbyste atë. Ne ju mbështesim ju sot, zoti Basha, sepse t’i ke faktuar të shkëlqesh në të gjithë jetën tënde, ti shkëlqeve si studenti shqiptar në universitetin e  vendeve të ulëta, si njëri prej studentëve më të shkëlqyer të atij universiteti . Universitet, që renditet në nivelet më të larta të universiteteve të Europës dhe të Botës. Ne të mbështesim ty, sepse jo vetëm shkëlqeve në studimet e tua, por pa internet dhe pa klikime të 99-shave, ti fitove vendin e parë në Botë në një nga konkurset me të rëndësishme për të drejtat  njerëzore. Pas mbarimit të studimeve, i riu që kishte ruajtur në shpirt dhe zemër dashurinë e madhe për kombin dhe vendin e tij, do të kthehej për të vendosur të gjithë njohuritë e tij në interes të madh të çdo shqiptari, të persekutimit  të kasapit të Ballkanit, Sllobodan Millosheviçit. Do t’i shërbente kombit me dashuri dhe zjarr, atje ku ai ishte me i lënduar”m deklaroi kryeministri. Berisha tha se cilësitë morale të kandidatit Basha e bëjnë atë të denjë për të qenë kryetari i ardhshëm i bashkisë së kryeqytetit. “Ne mbështesim sot Lulzim Bashën, bashkëshortin shembullor, prindin shembullor.  Në fakt ai, do të bëjë fushatë jo vetë i treti, por vetë i katërti, së bashku me Aurelën, me Dafinën, por së bashku edhe me të shumëpriturin apo të shumëpriturën.  Dëshmi kjo e vlerave që ne ju besojmë, e vlerave që Tirana i ka të shenja, e vlerave familjare, që Shqipëri i ka hyjnore”, tha Berisha. Sipas kryeministrit, Lulzim Basha ishte faktor i rëndësishëm i triumfit të Partisë Demokratike në 2005-ën, ndërsa më pas do të bëhej protagonist disa prej arritjeve më të mëdha atdhetare dhe kombëtare gjatë qeverisjes së Partisë Demokratike në kuadër të rifitimit të dinjitetit kombëtar të Shqipërisë dhe shqiptarëve si dhe ndërtimit të Shqipërisë Evropiane. “Ne mbështesim Lulzim Bashën, sepse në vitin 2005 sëbashku me një grup intelektualësh të rinj, të shquar, do të riktheheshin në gjirin e Partisë Demokratike, do të ktheheshin në faktorë të rëndësishëm, të vizionit të fitores së saj. Vitet tona nuk kanë qenë të lehta, vitet tona kanë njohur vështirësi, por historia edhe memoria  e çdo qytetari do ti mbajë mend ato si vitet e shndërrimit të ëndrrave më të bukura të shqiptarëve në realitet. Kombi ynë, kishte njohur copëtime, ndarje, pushtime, diktatura, ndarje të mëdha, nga malet dhe gjeografia. Ne jemi sot këto burrat dhe gratë që vendosëm secili nga një tullë në bashkimin kombëtar, në çlirimin kombëtar, daljen nga diktatura në liri. Prapë në pushtet, prapë në tryezën tonë, prapë në axhendën tonë, prapë në projektin tonë çështja kombëtare është çështja e parë, është çështja e dinjitetit të çdo qytetari. Ndaj dhe ne bëmë të pamundurën të mundur. Ne vendosëm të shembim malet të bashkojmë kombin. Në këtë detyrë, ne ngarkuam ministrin, zyrtarin, që me përkushtimin e tij do të kapërcente çdo pengesë, do të dilte mbi çdo gjë, do të bënte  që projekti i rrugës së Kombit të shndërrohej në realitet. Zoti Basha, armiqtë e saj të shumtë, u përpoqën të hedhin baltë mbi rrugën, mbi kombin. Menduan se do të mund të të kryqëzonin për fajin e vetëm, se shndërrove në realitet një nga ëndrrat shekullore të shqiptarëve.  Atyre ju mbetet e shkuara, kurse juve ju mbetet vizioni i ardhshëm për Tiranën e qytetarit, për Tiranën kryeqytet Europian”, deklaroi më tej kryeministri Berisha. Kreu i qeverisë vlerësoi se zoti Basha është personaliteti që do të udhëhiqte diplomacinë shqiptare drejt integrimit të Shqipërisë në NATO. “Partia Demokratike, qeveria do ti besonte atij diplomacinë shqiptarë, diplomacinë e integrimit të Shqipërisë në NATO. Diplomacinë e shndërrimit në realitet të ëndrrës më të bukur shqiptare. Sot Shqipëria është vend anëtar i NATO-s. Qytetari i saj i parë i ardhshëm, bëri gjithçka, bëri çdo gjë që kjo ëndërr fisnike të bëhet realitet dhe Tirana, kryeqyteti ynë të jetë kryeqyteti i një vendi anëtar i NATO-s”, tha kryeministri. Gjithashtu Berisha do të theksonte se Basha është edhe “njeriu që shkoi në Bruksel për të realizuar ëndrrën më të madhe e të bukur të të gjithë shqiptarëve”. “E duam Shqipërinë si gjithë Europa”, ishte kushtrimi dhe thirrja që buronte nga zemra e tij dhe e të rinjve shqiptarë  20 vjet më parë. Sot qytetari i parë i Tiranës del para jush, para çdo qytetari të Tiranës dhe mbarë Shqipërisë, pasi me përkushtimin e tij, talentin e tij, vendosmërinë e tij , ia doli së bashku me ekipin të bëjë që shqiptarët të lëvizin të lirë në mbarë Europën, të fluturojë në Bruksel, duke dërguar atje ëndrrën e bukur shqiptare, ëndrrën e lëvizjes së lirë”, vuri në dukje kryeministri. Në fjalimin e tij, Berisha u shpreh i sigurt se Basha do të bëjë të mundur ndryshimin e fytyrës së Tiranës, një qyteti që sipas tij, ka mbetur në stanjacion prej gjashtë vitesh. “Por ne, Tiranës dhe Shqipërisë, çfarëdo që të bëjmë, kurrë ndonjëherë borxhin nuk ia shlyejmë. Ndaj Tiranë, ne kemi borxhe dhe detyrime.  Jam përpjekur me dashurinë më të madhe, me mirënjohjen më të thellë të ndihmojmë si qeveri, të bëjmë çdo gjë për një Tiranë tjetër, pavarësisht se këto 6 vite Tirana qeveriset nga kundërshtarët tanë. Qeveria ime trefishoi fondet në mënyrë që qytetarët e Tiranës të ndienin në jetën e tyre të përditshme, të prekin ndryshimin dhe standardet e një Tiranë tjetër, por kjo u bë e pamundur, sepse Tirana e ëndrrës u  zëvendësua me Tiranën e betonit. Tirana e parqeve u zëvendësua me Tiranën e plehrave. Tirana e vizionit u zëvendësua me Tiranën e mbyllur. Tirana  po ecte në një drejt në të cilin çdo orë, çdo ditë, çdo javë, çdo muaj largohej nga qytetari i saj, nga jeta e qytetarit të saj, e fëmijëve të saj. I dashur zoti Basha, sot për qytetarët e Tiranës, për qytetarët shqiptarë, një nga ëndrrat më të bukura dhe më madhështore  është ëndrra e Tiranës Europiane, ëndrra e Tiranës së qytetarit, ëndrra e Tiranës të bukur”, deklaroi kryeministri Berisha duke përfunduar me premtimin se, “kjo qeveri, do së pari Tiranën e qytetarëve, Tiranën Europiane, si përparësinë e saj më madhore, ku qytetarët e saj të lëvizin si qytetarë Europiane, ku fëmijët e saj të shkollohen si fëmijë Europiane, ku të moshuarit e saj të ndihen si të moshuar Europiane, ku burrat dhe gratë e saj  të kenë mundësi të zhvillojnë gjithë energjitë e tyre, ku gjendja  krijuese e qytetarëve të Tiranës dhe mbarë kombit  të shndërrohen në fytyrën e vërtetë Europiane të Tiranës.