Kryetarja e Kuvendit pret në takim deputetin e Bundestagut gjerman, Valter Kolbou.Kolbou: Ndryshimet e Shqipërisë, optimizëm për të ardhmen në BE.

    Europa nuk do të ishte Europë pa Shqipërinë. Ju keni ecur shumë përpara vitet e fundit dhe ndryshimet që keni bërë janë arsye e fortë për të qenë optimistë për të ardhmen tuaj në BE, tha sot Valter Kolbou, përfaqësues i grupit parlamentar PSD në Bundestagun Gjerman,  në takimin me Kryetaren e Kuvendit të Shqipërisë Jozefina Topalli.   Për ne, tha Kryetarja e Kuvendit, partneriteti me Gjermaninë është shumë i rëndësishëm dhe tashmë pas anëtarësimit në NATO, ne jemi të lumtur që do të intensifikojmë bashkëpunimin dhe aleancën me vendin tuaj që na ka mbështetur gjithmonë.   Ne tha zoti Kolbou, i ndjekim me vëmendje zhvillimet pozitive në Shqipëri. Distancat gjegrafike mes Shqipërisë dhe vendeve të BE janë të shkurtra, ju jeni pjesë e Europës dhe ne e shohim vendin tuaj me një të ardhme të sigurt në Bashkimin Europian.   Deputeti Kolbou, një nga ekpertët e politikës gjermane në fushën e  mbrojtes, vlerësoi bashkëpunimin me Shqipërinë në misionet paqeruajtëse në botë duke theksuar se reformat e bëra nga Shqipëria në fushën ushtarake dhe jo vetëm, kanë qenë shumë të rëndësishme dhe të suksesshme dhe niveli i ushtarakëve shqiptarë në këto misione ka qenë shumë i lartë.   Shqipëria ka ecur shumë dhe veçanërisht vitet e fundit keni qenë shumë të suksesshëm. Ne jemi shumë të interesuar të intensifikojmë bashkëpunimin jo vetëm mes dy parlamenteve por mes dy vendeve tona, tha zoti Kolbou   Shqipëria, tha Kryetarja e Kuvendit, ka bërë ndryshime të mëdha në një kohë shumë të shkurtër. Për ne, anëtarësimi në NATO ka qenë një ngjarje e jashtëzakonshme, fryt i reformave të bëra, i vullnetit maksimal. Gjatë këtij mandati të parë, kemi ndërmarrë reforma të guximshme ligjore dhe ekonomike. Buxheti është dyfishuar, kemi rritur pagat e pensionet, investimet kanë qënë kolosale dhe rritja ekonomike vazhdon të jetë pozitive.   Fokusi ynë theksoi ajo, janë tashmë zgjedhjet e përgjithshme dhe për ne ska gjë më të rëndësishme se realizimi i zgjedhjeve më të mira që Shqipëria ka pasur. Jemi optimist për këtë sepse kemi arritur të krijojmë një infrastrukturë moderne zgjedhore të standardeve shumë të larta.   Duke u ndalur në politikën e  jashtme, Kryetarja e Kuvendit tha se përqendrimi është  në liberalizimin e vizave dhe do të bëjmë të gjithë përpjekjet për të përmbushur së shpëjti  këtë ambicje tonën dhe të të gjithë shqiptarëve.   Duke ofruar gjithë mbështetjen e Gjermanisë, dhe duke  uruar suksese në zgjedhjet e ardhshme parlamentare, zoti Kolbou shprehu interes për të forcuar më tej bashkëpunimin jo vetëm politik por edhe atë ekonomik mes Shqipërisë dhe Gjermanisë në fusha si turizmi, energjia apo infrastruktura.