Kryetarja e Kuvendit uron Presidentin e ri të Parlamentit Europian, Jerzy Buzek.

  Kryetarja e Kuvendit të Shqipërisë, Jozefina Topalli i dërgoi sot një letër urimi Presidentit të ri të zgjedhur  të Parlamentit Europian, zotit Jerzy Buzek.   Në letrën e saj drejtuar zotit Buzek, Kryetarja e Kuvendit, në emër edhe të Kuvendit të Shqipërisë, i bën urimet më të ngrohta dhe më të sinqerta për zgjedhjen si President i Parlamentit Europian.   Në letrën e saj drejtuar zotit Buzek, Kryetarja e Kuvendit, ndër të tjera shkruan:  
I nderuar zoti Buzek,   Shqipëria ka bërë bërë së fundmi një progres të jashtëzakonshëm. Ajo është sot anëtare me të drejta të plota e NATO-s. Falë reformave të gjithashme, ekonomike e ligjore ne arritëm të përmbyllim fazën e ratifikimit të MSA-së në një kohë rekord, duke bërë të mundur në prill dorëzimin e kërkesës për statusin e vendit kandidat në BE.   Paisja e qytetarëve me kartat e identitetit, nisja e procesit të paisjes me pasaportat biometrike, por edhe  rezultatet e qarta në luftën ndaj krimit e korrupsionit  janë hapa që tregojnë vullnetin tonë maksimal për përmbushjen e aspiratës europiane të shqiptarëve.   Qytetarët shqiptarë janë dhe ndihen qytetarë të  Europës. Ata  meritojnë të jenë pjesë e familjes europiane dhe, për realizimin e kësaj ëndrre ne besojmë fort në mbështetjen  Tuaj i nderuar zoti Buzek, edhe për faktin se ju vini nga një vend që e kupton më së miri këtë aspiratë.   Në letrën e saj, Kryetarja e Kuvendit  fton Presidentin e ri të Parlamentit Europian  për një vizitë zyrtare në Shqipëri.