Kryetarja e Kuvendit vijon të ndjekë nga afër, orë pas ore, situatën në fshatrat e dëmtuar nga përmbytjet.

Kryetarja e Kuvendit ndoqi sërish sot nga afër situatën, fshat më fshat, në komunat e prekura nga përmbytjet, në rrethin e Shkodrës.
 
Kryetarja e Kuvendit e shoqëruar nga deputetët e qytetit, ka takuar banorët e këtyre zonave, ku konfirmoi se i gjithë shteti në nivel qendror e lokal është në gadishmëri të plotë, orë pas ore, në mbështetje dhe ndihmë të tyre.
 
Kryetarja e Kuvendit shprehu një falenderim dhe mirënjohje të veçantë për forcat e ushtrisë, policisë, bluzat e bardha të shëndetësisë,  punojësit e drejtorisë elektrike të rrethit, si dhe ata të mirëmbajtjes së kanalizimeve,  të cilët treguan solidaritet dhe punuan me përgjegjësi të jashtëzakonshme për përballimin e situatës.
 
Kryetarja e Kuvendit vlerësoi organizimin e menjëhershëm të punës së  pushteti qendror dhe atë vendor së bashku Shtabin e Emergjencës pranë prefektit, të cilët ndërmorën çdo masë të nevojshme për të ndihmuar  banorët.
 
Gjatë bisedave me banorët e fshatrave, Kryetarja e Kuvendit  u kërkoi atyre mirëkuptim për të bashkëpunuar me forcat e ushtrisë dhe policisë për një zbatim sa më efikas të planit të evakuimit, në orët në vijim.
 
Kryetarja e Kuvendit vlerësoi vendosjen e urës së Belit që lidh fshatin Goricë me fshatin Muriqan dhe që ka bërë të mundur nxjerrjen nga izolimi të banorëve të fshatit Obot si dhe njëkohësisht ajo falenderoi për gadishmërinë  në shpërndarjen e ndihmave për banorët e kësaj zone.